SANTIAGO DE COMPOSTELA | 07/10/2017 | Actualizada ás 16:20 por EUROPA PRESS
A CIG anunciou que, ata o próximo día 16 de outubro, levará a cabo asembleas de traballadores no sector da seguridade privada no sete comarcas galegas para "darlle continuidade ás mobilizacións e accións sindicais que finalmente desemboquen na convocatoria dunha folga xeral".
Desde a central sindical denuncian que tras 10 meses de negociacións para renovar o convenio colectivo estatal, a patronal "continúa achegando propostas insuficientes", tal e como sinalou a propia CIG nun comunicado.
O anuncio foi realizado polo responsable de negociación colectiva de CIG-Servizos, Pedro Pérez, quen explicou que o sector "vive un estado de tensión e indefinición pola parte empresarial", que levou a "a ruptura dos contactos" o pasado 28 de setembro.
"Atopámonos cunha absoluta parálise da patronal, pospondo as reunións e facendo propostas totalmente inasumibles, e non querendo dar resposta á única plataforma de negociación presentada, que foi a da CIG", explicou o sindicato.
Con todo, proseguiu, a patronal maioritaria do sector, Aproser, convocou á representación sindical a unha reunión o pasado luns 2 de outubro, na que "anunciou a súa disposición de retirar da mesa as propostas máis regresivas": conxelación da antigüidade, recortes no complemento por incapacidade temporal e novo tratamento do transporte de fondos. Isto último, agregou a CIG, suporía a perda de empregos no sector.
Ademais, engadiu, achegou unha nova oferta económica que contempla un incremento salarial do cero por cento para 2017, do 1,4 para 2018 e do 1,3 para 2019.
"Para a CIG isto non deixa de ser unha operación de maquillaxe que non dá resposta ás necesidades do sector, xa que nos últimos 10 anos a perda de poder adquisitivo foi do nove por cento en relación co IPC, con varios anos co salario conxelado, redución dos pluses de nocturnidade e festividade que, xunto cos de transporte e vestiario que eliminaron das pagas extras, todo isto evidentemente non se recupera con esta proposta", denunciou Pedro Pérez.
Este luns día 9 hai unha reunión en Madrid na que Pérez insistirá nas propostas do sindicato.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.