SANTIAGO DE COMPOSTELA | 07/10/2017 | Actualizada ás 19:25 por EUROPA PRESS
O incendio forestal declarado na parroquia de Chaguazoso, no municipio Ourensán de Vilariño de Conso, permanece activo e afecta xa a unhas 50 hectáreas.
A Consellería do Medio Rural informou este sábado de que as lapas comezaron ás 22,35 horas do venres e, para a súa extinción, mobilizáronse tres axentes, 19 brigadas, dúas pas, seis helicópteros e un avión.
Pola súa banda, permanece controlado desde as 20,10 horas do pasado martes o incendio rexistrado en Lobios (Ourense), parroquia de Río Caldo, e que afecta o parque natural da Baixa Limia-Serra do Xurés.
O lume comezou ás 20,07 horas do luns e, as últimas estimacións cifran a superficie arrasada en máis de 20 hectáreas. No seu control participaron 20 axentes, 63 brigadas, 22 motobombas, tres pas, nove helicópteros e dous avións.
INCENDIO EN CHANDREXA DE QUEIXA
Así mesmo, o departamento que dirixe Ángeles Vázquez destacou que continúa controlado desde as 15,47 horas do venres o incendio declarado no concello de Chandrexa de Queixa (Ourense), parroquia de Queixa e que, segundo as últimas estimacións, afecta a unha superficie de 70 hectáreas.
En concreto, as lapas comezaron ás 22,45 horas do xoves e na súa extinción participaron sete axentes, 17 brigadas, seis motobombas, dúas pas, seis helicópteros e un avión.
Ademais, tamén segue controlado desde as 13,20 horas do venres o lume que empezou ás 3,51 horas neste mesmo municipio ourensán e idéntica parroquia.
A superficie afectada é dunhas 100 hectáreas, conforme ás estimacións provisionais. No seu control traballaron un técnico, tres axentes, cinco brigadas, unha motobomba, dúas pas, dous helicópteros e un avión.
EXTINGUIDO O DE VERÍN
Pola súa banda, o incendio forestal declarado este sábado nas inmediacións do Parador de Verín (Ourense) foi extinguido ás 18,54 horas tras afectar a unha superficie de 2,30 hectáreas de monte raso.
Nos labores de extinción participaron un axente, dúas brigadas, dúas motobombas e un helicóptero.
A Consellería do Medio Rural lembrou que está a disposición da cidadanía o número de teléfono gratuíto 085, ao que deben chamar en caso de detectar algún incendio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.