Os outonos fríos serán unha excepción, segundo MeteoGalicia

O coordinador de Predición Operativa de Meteogalicia, Juan Taboada, asegurou que os outonos fríos converteranse, a medida que pasen os anos, nunha "excepción", xa que as altas temperaturas para a época do ano a partir de setembro "serán a norma". Así o indicou nunha entrevista este domingo en Radio Nacional, na que indicou que a falta de precipitacións nos últimos meses débese a que o anticiclón dos Azores se atopa desprazado ao norte.

Este fenómeno fai que as borrascas atlánticas que continuamente chegan ao noroeste peninsular se desvíen máis cara ao norte. Unha situación que, segundo Taboada, se corrixirá na segunda quincena de outubro, o que fará que volvan as precipitacións a Galicia.

Taboada apuntou que "o clima non cambiou", xa que "seguen vindo influencias do oeste". "O normal é que as recuperemos (as borrascas). A circulación xeral non cambiou. A medida que avancemos no inverno, o normal é que volva o aire frío e cheguen as borrascas", declarou, a pesar de que matizou que se trata dunha situación "que non se pode predicir".

SECA

Esta mesma semana declarouse a alerta por seca en varias zonas hidrográficas en Galicia motivada, precisamente, pola falta de choivas neste 2017.

E é que, como lembrou, Galicia acumula cinco estaciones consecutivas con déficit de choivas, especialmente durante o último outono-inverno, cando os niveis de precipitacións se situaron "entre un 30 e un 40 por cento" por baixo do normal.

Porén, apuntou que "de nada serve que chova, se son choivas torrenciais", á vez que descartou que, nun futuro próximo, se poidan producir fenómenos meteorolóxicos extremos en Galicia como furacáns.

Unha posibilidade da que alertan algúns expertos aínda que, como recoñeceu Taboada, trátase dunha realidade "moi remota", xa que na creación de furacáns inflúe a temperatura do mar e a do Atlántico que baña Galicia é baixa.