Por gcdeportes | Compostela | 08/10/2017 | Actualizada ás 23:48
Nova alegría para o tríatlon galego. Uxío Abuín (Olímpico de Vedra) logrou o triunfo no circuíto das Copas de Europa 2017 tras conseguir o bronce na última proba en Melilla e axudado polo abandono do, ata entón líder provisional, Joao Pereira. En Melilla tamén estaban Antonio Serrat (Tri-Penta Terras de Lugo), que tivo que retirarse; Andrés Cendán (Cidade de Lugo Fluvial), que foi 28º, e Inés Santiago (Tríatlon Ferrol), 11ª na proba feminina. E a xuíza internacional galega, Mónica Flores.
Uxío tiña complicado o triunfo no circuíto pero estaba disposto a poñer en apuros a Joao Pereira, e así foi a por todas dende o inicio. Estivo entre os mellores na natación, xunto a Antonio Serrat, e incluso os dous galegos tentaron escaparse no inicio da bicicleta. Pero axiña o grupo principal, cos grandes favoritos, logrou collelos. Tocaba agardar o momento de atacar, pero a bicicleta foi decisiva. O líder do circuíto Joao Pereira tivo que abandonar a proba tras unha caída e de golpe, as opcións de Uxío medraron. Tamén tivo que retirarse o vigués Serrat por unha avaría, e así Uxío perdeu a un importante apoio para a carreira a pé. Pero, un ano máis, Abuín está a facer un final de tempada excepcional e pode con todo, o que lle permitiu acadar o bronce e garantir así o seu triunfo no circuíto. O podio estivo formado polo belga Geens (ouro), o francés Montoya (prata) e Abuín (bronce).
Uxío Abuín logra deste xeito o título no circuíto (igual que no ano 2015) cuns resultados incribles: triunfo en Altafulla, segundo posto en Quarteira, bronces en Melilla e Gran Canaria, ademais do quinto lugar no Campionato de Europa de distancia olímpica disputado en Kitzbuhel. Ademáis, hai tan só unha semana, acadou o ouro na Copa do Mundo en Weihai (China).
Na categoría feminina, Inés Santiago estivo sempre entre as primeiras clasificadas, facendo unha proba moi regular. Saíu da auga na décima posición e foi moi rápida na T-1, o que lle permitiu comezar o segmento de bicicleta na oitava posición. Aguantou os 40 quilómetros de ciclismo no grupo de cabeza, aínda que non se atopaba moi fina, e así saíu da segunda transición na 17ª posición. E como sempre fai Inés, escalou posicións na carreira a pé, onde recuperou as boas sensacións. Trala primeira volta xa era 12ª e na segunda, ocupaba a 11ª posición, de onde non se baixou ata parar o crono en 2h.10.53.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.