Avalancha de incendios con parte do dispositivo antilumes na casa

Ao rematar a tempada de alto risco, moitos brigadistas e bombeiros forestais quedan sen contrato. En pleno outubro arden oito lumes, que queiman máis de 1.200 hectáreas, parte en zonas de gran valor como O Courel e O Xurés. Unha asociación ecoloxista denunciará á conselleira por "abandono de funcións".

Por E.P. | SANTIAGO DE COMPOSTELA | 12/10/2017 | Actualizada ás 13:09

Comparte esta noticia

As provincias de Lugo e Ourense continúan este xoves afectadas polos incendios forestais. En concreto, os efectivos traballan nun total de oito lumes, catro deles aínda activos, que calcinaron máis de 1.200 hectáreas de terreo.

Incendio no Courel
Incendio no Courel | Fonte: BRIF Laza

ARDEN MÁIS DE 600 HECTÁREAS NUN PARQUE NATURAL

A situación máis preocupante vívese no Parque Natural Baixa Limia-Serra do Xurés, onde o maior dos incendios rexistrados nos últimos días, xa estabilizado, queimou 650 hectáreas.

Este lume iniciouse na parroquia de Río Caldo, no municipio de Lobios, na noite do domingo e quedou estabilizado sobre as 20,50 horas deste mércores, tras queimar unhas 650 hectáreas dentro do Parque Natural Baixa Limia.

No lugar traballaron 17 axentes, 33 brigadas, 17 motobombas, catro avións e sete helicópteros, así como persoal da Unidade Militar de Emerxencias.

Outros dous lumes, un controlado e outro aínda activo, afectan tamén a este parque natural, ambos os iniciados na parroquia de Río Caldo de Lobios. En concreto, o incendio que continúa activo, que comezou na noite do domingo, afectou a unhas 90 hectáreas e no seu control traballaron 11 axentes, 42 brigadas, 18 motobombas, tres pas, cinco helicópteros e dous avións.

Do mesmo xeito, permanece controlado desde o 3 de outubro outro lume na parroquia de Río Caldo, que calcinou unhas 51 hectáreas de terreo dentro do Parque Natural Baixa Limia-Serra do Xurés.

ACTIVOS EN VILARIÑO E FOLGOSO

Por outra banda, a Consellería do Medio Rural informou de que permanecen activos dous incendios forestais no municipio ourensán de Vilariño de Conso.

En concreto, permanece activo desde as 17,00 horas deste mércores un lume na parroquia de Chaguazoso, que, segundo as estimacións provisionais, afectou a unhas 150 hectáreas.

No mesmo municipio, pero na parroquia de Fitorio, está activo desde pouco antes das 2,00 horas da madrugada deste xoves, outro incendio forestal, que afecta xa a unhas 20 hectáreas de terreo.

Finalmente, na provincia de Lugo, permanece activo desde as 7,27 horas deste mércores outro incendio forestal, xa perimetrado, en Folgoso do Courel, concretamente na parroquia de Meiraos. A Xunta estimou que as lapas afectaron a unhas 150 hectáreas.

A maiores, os efectivos de extinción estabilizaron o lume rexistrado na parroquia de Queixa, no municipio ourensán de Chandrexa de Queixa, que calcinou unhas 50 hectáreas de terreo; e permanece controlado desde as 21,55 horas deste mércores o incendio de Rebordechau, en Vilar de Barrio (Ourense), que afectou a unha superficie dunhas 80 hectáreas.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 3 comentarios

2 Pachi Lucas

E Núñez Feijoo, mais preocupado en ver desfilar a cabra da Legión

1 o ultimo toxo

soamente a uns parvos poden mandar para casa a xente con todo feito un secarral e 30 graos de temperatura... FRIJOLES AQUI ALGUEN TEN QUE DIMITIR, ALGUEN TENDRA QUE EXPLICALO! e mais incluso mandaron de vacacions a moita xente fixa... quedando o minimo para o dos lunes...

1 Antilumes

Feijoo 1º el Arrasador