O novo xulgado de Familia de Vigo instalarase no edificio de La Gota de Leche e empezará a funcionar o 1 de xaneiro

A Xunta de Galicia investirá uns 30.000 euros no acondicionamento dun espazo de 380 metros cadrados no segundo piso do edificio coñecido como La Gota de Leche, onde se situará o novo xulgado de Familia de Vigo, que empezará a funcionar o próximo 1 de xaneiro.

Así o confirmou este venres o vicepresidente da Xunta, Alfonso Rueda, que visitou esas instalacións acompañado polo director xeral de Xustiza, Juan José Martín, e polo delegado territorial do Goberno galego, Ignacio López-Chaves.

Segundo explicou Rueda, este novo xulgado contará con todos os equipamentos e espazos adecuados para empezar a funcionar sen problemas o próximo 1 de xaneiro, e ocupará esta localización durante uns dous anos, o tempo en que se prevé que entren en servizo as novas dotacións xudiciais de Vigo, na nova Cidade da Xustiza (no antigo Hospital Xeral, que está en fase de reforma).

Esta nova dotación contará con sala de vistas, cinco despachos e sala de espera, entre outros servizos, onde traballarán 11 funcionarios (incluíndo a xuíz e letrado da Administración de Xustiza).

O vicepresidente da Xunta recalcou que estas novas instalacións súmanse a outros investimentos realizados polo goberno galego na administración de Xustiza da cidade. Así, lembrou a posta en marcha do novo servizo de notificacións e embargos (edificio no que tamén está o xulgado de cláusulas chan), os investimentos en obras menores para mellorar as instalacións da rúa Lalín, ou o propio proxecto da Cidade da Xustiza, que se licitará e adxudicará en próximas semanas.