Por Galicia Confidencial | A Coruña | 14/10/2017 | Actualizada ás 11:00
Cerna, o colectivo nacionalista que se escindiu de Anova e que forma parte de En Marea, desvinculouse da moción de censura en Fene, tras o pacto acadado entre Somos Fene e o PP para sacar da alcaldía ao BNG e Esquerda Unida.
“Ante certas informacións erróneas con motivo dunha moción de censurano Concello de Fene, fai saber á opinión pública que na candidatura de "Somos Fene" non hai ningunha persoa afiliada ao noso partido”, apunta este grupo nun comunicado tras as críticas que lle choveron desde distintos ámbitos.
Así, o concelleiro da Marea Atlántica Alberto Lema cargou contra Cerna e o responsabilizou da decisión de Somos Fene. “A xente de Cerna facendo o que sabe facer, forza aos compañeiros do BNG”, escribiu nas súas redes sociais. Tamén cargos do BNG sinalaron directamente a esta formación nacionalista.
En Marea xa publicou o mércores, en canto se confirmou a presentación da moción de censura, un comunicado no que “rexeita categoricamente a moción de censura presentada por Somos Fene co apoio do Partido Popular no Concello de Fene e que segue a liña de tráfico político coa que o PP está operando en concellos como Sanxenxo, Tui ou o propio Fene”.
Con todo, e a pesar de criticar esa moción públicamente e de deixar claro que os dous concelleiros non teñen nada que ver coas mareas, este venres Bieito Lobeira, membro da Executiva Nacional do BNG, insistía en vincular o acontecido con En Marea. Así, pedía explícitamente ao seu líder, Luís Villares, que tome medidas contra os dous edís de Somos Fene, “máis alá de aspectos declarativos”. O BNG goberna en Fene co apoio de Esquerda Unida, outro partido que forma parte de En Marea, e que tamén desmentíu que a formación que lidera Villares estea detrás desta moción de censura.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.