Localizan globos cunha bengala en Salceda lonxe dos lumes
A Garda Civil investiga a súa posible relación cos incendios forestais dos últimos días.
Por E.P. | VIGO | 17/10/2017 | Actualizada ás 18:51
Un veciño do municipio de Salceda de Caselas (Pontevedra) localizou globos cunha bengala e a Garda Civil investiga a súa posible relación cos incendios forestais dos últimos días.
Segundo informaron fontes do Instituto Armado, este artefacto pirotécnico consta de seis globos de cor branca enganchados a unha bengala, das que se usan habitualmente nas festas particulares e que, unha vez prendidas, "desprenden luminiscencias de escasa capacidade calorífica".
Os servizos técnicos da Benemérita investigan agora a potencial capacidade incendiaria deste artefacto e a súa posible relación cos últimos incendios forestais, aínda que precisaron que o achado se produciu nun lugar "moi afastado das zonas afectadas polo lume".
Un veciño de Salceda de Caselas informou á Garda Civil de que localizara este artefacto o pasado domingo, pousado sobre uns viñedos próximos á estrada EP-2505, en Salceda de Caselas.
