As disolucións matrimoniais descenden en Galicia un 11,8% no segundo trimestre do ano

O número de demandas de disolución matrimonial (separacións e divorcios) presentadas en Galicia no segundo trimestre deste ano ascendeu a un total de 1.584, fronte ás 1.797 que se presentaron no mesmo período do ano pasado.

Estas cifras supoñen un descenso do 11,8 %, unha porcentaxe por encima da media estatal, onde o descenso foi do 10,3 por cento, segundo recolle o informe da Sección de Estatística do Consello Xeral do Poder Xudicial (CGPJ), difundido polo Tribunal Superior de Xustiza de Galicia (TSXG).

De acordo con estes datos, na Comunidade autónoma galega descenderon tanto os divorcios consensuados (de 954 no ano 2016 a 857 no segundo trimestre deste ano, o que supón unha caída do 10,2 %), como o non consensuados (de 761 a 668, un 12,2 % menos).

En relación ás separacións de mutuo acordo, pasaron de 51 a 45, mentres que as contenciosas evolucionaron de 31 a 14. Neste período rexistráronse dúas peticións de de nulidade matrimonial.

Pondo en relación as demandas de disolución matrimonial do trimestre coa poboación a 1 de xaneiro de 2017, Galicia sitúase en 5,85 peticións por cada 10.000 habitantes, por baixo da media estatal (6,44).

MODIFICACIÓN DE MEDIDAS

Mentres, no segundo trimestre do ano rexistrouse unha lixeira diminución interanual nos procedementos de modificación de medidas, e un pequeno aumento nos de garda, custodia e alimentos de fillos non matrimoniais.

Así, entre o 1 de abril e o 30 de xuño deste ano iniciáronse 141 procedementos de modificación de medidas de mutuo acordo, un 9 % menos que no mesmo período do ano anterior, cando se rexistraron 155.

As demandas de modificación de medidas non consensuadas pasaron de 515 o ano pasado, a 512 en 2017, o que supón un descenso interanual do 0,6 %.

En canto aos procedementos de garda, custodia e alimentos de fillos non matrimoniais, rexistráronse 265 demandas de modificación de medidas consensuadas, fronte ás 239 do segundo trimestre de 2016, o que supón un 10,9 % máis.

Tamén houbo 351 demandas de modificación de medidas non consensuadas (347 o ano pasado), o que representa un incremento interanual do 1,2 %.

DISOLUCIÓNS NO ESTADO

No ámbito estatal, o número de demandas disolución matrimonial, separacións e divorcios, no segundo trimestre de 2017 experimentou unha diminución do 10,3 por cento respecto ao mesmo período do ano anterior, ao pasar de 33.434 a 29.988, segundo o CGPJ.

A maior redución interanual deuse nas separacións non consensuadas, xa que as 440 presentadas supoñen un 14,6 por cento menos que as rexistradas no segundo trimestre de 2016. Mentres, as separacións de mutuo acordo caeron un 12,1 por cento (de 1.061 a 933).

En canto aos divorcios, as 17.095 demandas de divorcio acordadas son un 9,3 por cento menos que as presentadas entre o 1 de abril e o 30 de xuño de 2016; mentres que as 11.520 demandas contenciosas representan un descenso do 9,3 por cento respecto ao mesmo período do ano anterior.