As familias dos falecidos nos incendios percibirán indemnizacións de 75.000 euros
As vivendas habituais serán beneficiarias de axudas ata cubrir "o 100%" do valor da reparación ou reposición do inmoble danado
Por E.P. | SANTIAGO DE COMPOSTELA | 19/10/2017 | Actualizada ás 19:26
O Goberno galego aprobou este xoves o decreto de medidas urxentes de axuda para a reparación dos danos ocasionados polos incendios dos días pasados, que inclúe indemnizacións que, no caso de falecemento e incapacidade permanente absoluta serán de 75.000 euros, e de entre 60 e 103 euros por día de hospitalización.
Na rolda de prensa posterior ao Consello da Xunta, Feijóo subliñou que se "incrementan" as indemnizacións porque, no caso dos incendios non se trata "só dunha situación de emerxencia", senón que hai "unha intencionalidade delituosa" tras o "terrorismo incendiario". "Que pregunten ás familias das catro vítimas mortais se atenta ou non contra a vida", indicou. "Faremos fincapé niso", subliñou, antes de recalcará que a "prioridade absoluta" do Goberno é atender ás familias.
"Que sirva de algo para paliar moral e economicamente" a quen perderon familiares como consecuencia "do terrorismo incendiario", manifestou Feijóo, quen tamén avanzou outro tipo de axudas para paliar os efectos dunha vaga de incendios que provocou o desaloxo provisional de 2.500 persoas e que 32 vivendas quedasen "afectadas ou destruídas" polo lume.
Así, as vivendas que constitúan a residencia "permanente e habitual" dos seus moradores e nas súas instalacións complementarias serán beneficiarias de axudas ata cubrir "o cento por cento" do valor de reparación ou reposición do inmoble danado, cun máximo que suporá o 75 por cento do prezo dunha vivenda protexida na mesma localidade.
VIVENDAS OCASIONAIS E OUTRAS CONSTRUCIÓNS
No caso das vivendas de carácter ocasional, poderán recibir axudas de ata o 40 por cento do valor de reparación ou reposición do inmoble danado.
En concereto, inclúense as construcións anexas e instalacións complementarias e elementos comúns como pozos, hórreos, alpendres, invenaderos para autoconsumo ou instalacións eléctricas e de iluminación, instalacións de telecomunicacións, a condición de que estean situadas no mesmo predio da vivenda.
Serán igualmente obxecto de axudas os danos sufridos no enxoval doméstico de primeira necesidade e, do mesmo xeito que nas vivendas, "cubrirá o cento por cento" se é da vivenda habitual ou o 40 por cento no caso de vivenda ocasional.
Ademais, a Xunta poderá contribuír a sufragar os gastos que orixine o aloxamento provisional daquelas persoas que, como consecuencia da acción dos incendios, teñan que abandonar temporalmente as súas vivendas e, no seu caso, mentres efectúen as obras de reparación.
A estes efectos, poderá celebrar convenios ou acordos con outras administracións públicas ou con organizacións especializadas no auxilio ou asistencia a damnificados en situacións de sinistro ou catástrofe.
