Galicia alcanzou en agosto o maior superávit comercial de toda España con 1.565 millóns de euros en exportacións

A Comunidade galega alcanzou os 453,7 millóns de euros na balanza comercial durante o mes de agosto, con exportacións por valor de 1.565,1 millóns de euros e importacións de 1.111,5 millóns. Deste xeito, Galicia situouse no oitavo mes do ano como a comunidade autónoma con maior superávit comercial.

Diso informou este venres a Dirección Territorial de Comercio e ICEX en Galicia nun informe no que apunta que o sector con maior incidencia na exportación foi o de manufacturas de consumo (38%), seguido por alimentación (16,2%), semimanufacturas (12,3%), automóbiles (8,7%) e bens de equipo (8,3%).

Todos eles suman o 83% das exportacións galegas durante o mes de agosto, no que o mercado europeo continuou sendo o principal cliente ao concentrar o 76,% das exportacións. Así, Francia recibiu un 12,9% do total de vendas galegas ao exterior, polo 12,7% cuxo destino foi Portugal. Italia (8,8%), Reino Unido (7,4%), Países Baixos (7,3%), Alemaña (6,7%) e Bélxica (6,1%) foron outros dos principais clientes das empresas galegas.

En canto aos países de destino fóra da UE, Marrocos segue sendo o principal mercado cun 3,8% --o país africano é o noveno país destino das exportacións--, seguido por Estados Unidos (3,0%), México (2,5%), Turquía (2,6%), México (1,3%), China (0,9%), Arxentina (0,8%) e Chile (0,7%).

UN 8,1% DO TOTAL ESPAÑOL

Galicia representou o 8,1% do total das exportacións españolas en agosto, mes no que rexistrou un aumento do 2,1% en vendas respecto ao mesmo período do pasado ano. No que vai de 2017, as vendas ao estranxeiro creceron un 8,4% e supoñen o 7,6% do total de España.

En canto ás importacións, a Comunidade galega comprou ao exterior un 4,9% de todo o adquirido no conxunto español no oitavo mes do ano. Así as cousas, respecto ao mes de agosto de 2016, Galicia importou un 14,6% menos.

DATOS ESTATAIS

No ámbito estatal, o déficit comercial alcanzou os 16.414 millóns de euros entre xaneiro e agosto de 2017, o que supón un incremento do 49,2% respecto ao mesmo período do ano anterior, a pesar de que as exportacións repuntaron un 9,1%, ata os 182.302 millóns, novo máximo histórico.

A alza das exportacións españolas, que rexistraron mellor evolución que as do conxunto da zona euro e da UE, non permitiu compensar o importante incremento das importacións, que repuntaron neste mesmo período un 11,6%, ata alcanzar os 198.716 millóns de euros.

A taxa de cobertura --exportacións sobre importacións-- situouse no 91,7%, o terceiro mellor rexistro de toda a serie histórica, só superado en 2013 e 2016.

Pola súa banda, o saldo non enerxético arroxou un déficit de 1.721 millóns de euros ata agosto, maior que o déficit de 156 millóns acumulado no mesmo período de 2016, mentres que o déficit enerxético incrementouse un 35,5%, ata os 1.693 millóns de euros.

O crecemento das exportacións españolas entre xaneiro e agosto superou o do conxunto da zona euro (+7,6%) e a UE (+7,9%), así como as taxas de Francia (+3,6%), Alemaña (+6,5%), Italia (+7,6%), aínda que é inferior á de Reino Unido (+18,3%). Tamén creceron as vendas de Estados Unidos (+6,4%), China (+5,3%) e Xapón (+11%).

MENORES VENDAS A REINO UNIDO

Entre os principais sectores que contribúen ao crecemento da exportación destacan os produtos enerxéticos (o 6,7% do total) que subiron un 53,5%; bens de equipo (20,2% do total) que creceron un 9,2%, e alimentación, bebidas e tabaco (16,9% do total) que se incrementaron un 7,9%. As únicas contribucións negativas proviñeron do sector do automóbil (16,3% do total) cuxas exportacións se reduciron un 0,7% e da rúbrica doutras mercadorías (1,3% do total), que mostraron unha caída dun 14%.

As exportacións dirixidas á UE (o 65,7% do total) subiron entre xaneiro e agosto un 8,2%, mentres que as vendas á zona euro (51,5% do total) aumentaron un 8,9%, e as destinadas ao resto da UE (14,2% do total), fixérono en menor medida, cun incremento do 5,4%, como consecuencia da depreciación da libra e as menores vendas a Reino Unido.

As maiores vendas a terceiros destinos (34,3% do total e incremento do 11%) viñeron impulsadas polo incremento das exportacións a Oceanía (+27,5%), América Latina (+12,5%), Asia excluído Oriente Medio (+12,2%), África (+10,7%) e América do Norte (+10,5%). Pola contra, reducíronse as destinadas a Oriente Medio (-0,2%).

Por países, destacan os crecementos nas vendas a Australia (+23,3%), China (+24,9%), Marrocos (+16,3%), Arxentina (+28,7%), México (+14,4%), e Brasil (+8,4%).

MÁIS IMPORTACIÓNS POLA RECUPERACIÓN

En canto ás importacións (+11,6%), os maiores prezos enerxéticos, xunto coa consolidación da recuperación económica, explican o crecemento na maioría de sectores. Así, as de produtos enerxéticos (13,5% do total) subiron un 43,1%; as de bens de equipo (21,4% do total) ascenderon un 10,4%; e as de semimanufacturas non químicas (7,2% do total) aumentaron un 17,7%.

En agosto, as exportacións de mercadorías creceron un 9% sobre o mesmo mes de 2016, ata os 19.238 millóns de euros. As importacións aumentaron un 11,2% en termos interanuais ata os 22.464 millóns de euros.

Como resultado, rexistrouse un déficit mensual de 3.227 millóns, o que supón un 26% máis que o déficit de 2.560 millóns no mesmo mes de 2016. O saldo non enerxético arroxou un déficit de 1.809 millóns de euros (déficit de 1.170 millóns de euros en agosto de 2016) e o déficit enerxético incrementouse un 2%.