Os neonazis de Hogar Social estiveron nas Neves repartindo auga como "axuda humanitaria"
Voluntarios colléronlles as botellas e, amablemente, dixéronlles que "aquí xa non se necesitaban máis". Non tardaron moito en marchar.
- Resposta da sociedade galega contra a visita dos neonazis de Hogar Social
- O grupo neonazi Hogar Social anuncia que virá con “axuda humanitaria” a unha Galicia ‘terceiromundista’
Por Galicia Confidencial | Arbo | 21/10/2017 | Actualizada ás 22:39
Anunciaron que virían a Galicia esta fin de semana con "ayuda humanitaria" e, ao final, cumpriron a súa palabra. O que non dixeron era onde estarían, nin cando. Con todo, GC foi informada de que diversos integrantes de Hogar Social estiveron nas Neves, un dos concellos máis afectados pola vaga de lumes.
Segundo fontes consultadas, integrantes deste grupo neonazi, vestidos cun peto azul da organización Hogar Social, chegaron nunha furgoneta sobre as 18.00 horas. A súa "axuda humanitaria" foron botellas de auga.
Algúns voluntarios que estes días traballan día e noite para tentar normalizar a situación neste concello colléronlles a auga e, "amablemente", dixéronlles que "aquí xa non se necesitaba máis". De feito, a súa visita, non foi benvida, nin polos voluntarios, nin polo propio concello. Tras pasear pola vila, os neonacis montaron na furgoneta e marcharon. "A estes mellor telos lonxe", comentou unha voluntaria.
Polémica
Tras publicar GC que este grupo estaba disposto a vir a Galicia, foron moitos galegos os que, a través das redes sociais expresaron o seu rexeitamento a unha visita "non desexada". Algúns mesmo anunciaban "movida" se sabían onde ían estar. Finalmente, o grupo decidiu non dicir onde acudirían.
Hogar Social é coñecido en Madrid por ser un grupo neonazi e populista que presta axuda só a xente con ADN español, discriminando aos estranxeiros e avivando o discurso do odio contra estes.
