Por Galicia Confidencial | Compostela | 27/10/2017 | Actualizada ás 10:51
Todas as grandes cidades e as principais vilas galegas serán o escenario este venres pola noite de diversas concentracións "en solidariedade co pobo de Catalunya" pola aplicación do artigo 155, que implica a suspensión da autonomía.
"Diante da escalada represiva que o Estado Español está a exercer en Catalunya, e diante da activación do artigo 155 da constitución española, verdadeiro golpe de estado á democracia, desde a CIG temos que responder, e así o facemos, solidarizándonos co pobo catalán e exixindo do Estado Español que cese no seu empeño por calar a voz de quen unicamente quere expresarse en liberdade e exercer o seu dereito a decidir", indica a CIG nun comunicado.
Esta entidade, xunto con outros sindicatos e partidos políticos chama a participar nas concentracións convocadas pola Plataforma Galiza con Catalunya que terán lugar ás 20: 00 horas, agás en Cangas, que será ás 19:00 horas.
"O Estado porfía en aplicar a represión, impón sancións económicas e administrativas e encarcera persoas por motivos políticos, por defenderen o dereito do pobo catalán a se expresar sobre o seu propio futuro", indica este sindicato. "Nun momento tan difícil para o soberanismo catalán, que vive ameazado por unha verdadeira cruzada contra a liberdade exercida polo estado español, e por unha actuación brutalmente represiva de todos os poderes do Estado, queremos transmitir desde a Confederación Intersindical Galega toda a solidariedade de clase ao pobo de Catalunya", engade.
As concentraciósn previstas serán en:
· Santiago: Praza do Toural, 20h
· A Coruña: Subdelegación do Goberno, 20h
· Lugo: Subdelegación do Goberno, 20h
· Ourense: Subdelegación do Goberno, 20h
· Pontevedra: Praza da Peregrina, 20h
· Vigo: Farola de Urzaiz, 20h
· Ferrol: Praza Amada García, 20h
· Ribadeo: Concello, 20h
· Viveiro: Concello, 20h
· Cangas: Concello, 19h
· Vilagarcía, Praza de Galiza, 20h
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.