Por gcdeportes | Lugo | 27/10/2017 | Actualizada ás 23:39
Ficha técnica
Melilla 79: Dani Rodríguez (8), Kapelan (12), Pablo Almazán (10), Mamadou Samb (9), Fran Guerra (12) –cinco inicial- Miki Servera (1), Filip Djuran (3), Javi Lucas (8), Edu Durán (8), Fall (4) e Juan Rubio (4).
CB Breogán 83: Cristian Díaz (7), Salva Arco (18), Löfberg (5), Demetrio (6), Matt Stainbrook (20) –cinco inicial- Ricardo Uriz (16), Sergi Quintela (2), Guille Rubio (7), Sulejmanovic (2), Cigoja (0).
Parciais: 14-18, 18-24 (32-42), 19-18, 28-23 (79-83).
Árbitros: Ángel de Lucas e Jaime Gómez Luque. Eliminaron por cinco faltas persoais a Johan Löfberg.
Incidencias: partido da 6ª xornada da LEB Ouro no pavillón Javier Imbroda de Melilla.
Que sufrimento innecesario. Tras 35 minutos espectaculares, sobre todo en defensa, Breogán gañaba de 16 no último cuarto (57-73) e pensou que xa estaba feito. Melilla acadou un parcial de 21-5 para empatar o partido 78-78 tras unha tripla de Kapelan. Menos mal que estaba Matt Stainbrook, que reboteou en ataque e anotou o 78-80. Kapelan errou un tiro libre e Ricardo Úriz sentenciou dende o 4,60. Quinta vitoria en cinco partidos. O Cafés Candelas Breogán é líder invicto da LEB Ouro.
E iso que ao Breo non lle entraba nada no arrinque. E Melilla foise ata o 11-2 tras unha tripla de Pablo Almazán. Natxo Lezcano tivo que parar o partido e os lucenses reaccionaron tras unha tripla de Cristian Díaz cun parcial de 0-9 para empatar o choque. Outra tripla de Úriz, outro parcial de 0-7 e o Breo gañaba 14-18 tras dez minutos.
Filip Djuran anotou unha tripla, pero respostaron Ricardo Úriz, con outras dúas triplas, e Salva Arco con sete puntos consecutivos. Melilla parou o partido con 22-33 a 4:56 do descanso, pero Arco anotou outra tripla e Breogán acadou a máxima diferenza: 24-36. Reaccionaron os locais con triplas de Kapelan e Javi Lucas, e Lezcano pediu tempo morto con 32-36. Tripla de Díaz e parcial de 0-6 para irse a vestiarios con 32-42, con 7/13 en triplas para os lucenses nos dous primeiros cuartos.
Guille Rubio anotou unha tripla e Matt Stainbrook fixo medrar a vantaxe ata os 15 puntos (38-53). Melilla parou o partido e probou coa defensa en zona, pero Löfberg de tres e Sulejmanovic con dous tiros libres (45-60) mantiñan o Breo sen apuros. Os locais achegáronse cun parcial de 6-0 para entrar 51-60 no último cuarto.
Os puntos de Salva Arco e Stainbrook puxeron a máxima diferenza do partido (55-71, 57-73). Unha nova vitoria estaba no peto, pero os lucenses relaxáronse e permitiron que o rival volvese entrar no partido. Tras unha técnica ao técnico local, 68-78, pero con Samb, cos tiros libres e unha antideportiva a Löfberg, Melilla acadou un parcial de 10-0 e empatou o partido. Un rebote con canastra de Stainbrook foi decisivo, e os tiros libres de Úriz fixeron xustiza para Breogán.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.