Polémica pola visión que a Xunta dá da muller no día contra a violencia machista

En Marea pide a retirada da campaña do Goberno de Feijóo para o 25 de novembro porque "cosifica" á muller. A idea da Xunta é publicitala nos medios tradicionais e a través das redes sociais.

Por Galicia Confidencial | Compostela | 13/11/2017 | Actualizada ás 09:00

Comparte esta noticia

Nova polémica a conta da imaxe da muller. En Marea reclama a retirada da campaña institucional da Xunta para o 25 de novembro (Día Internacional da Eliminación da Violencia contra a Muller) ao considerar que existe "unha cousificación da muller e un tratamento paternalista cara a ela".

Cartel do Día contra a Violencia Machista
Cartel do Día contra a Violencia Machista

'O máis grande de Galicia non se maltrata' é a lema da campaña institucional do Goberno galego para o 25 de novembro, na que se presenta á muller galega como "unha xigante" que se sobrepón a todas as adversidades. Así, comparadas aos principais monumentos do catro provincias galegas, tres mulleres de tres rangos de idade diferentes protagonizan a campaña, que se difundirá a través de cartelaría, medios de comunicación --os de sempre; é dicir medios tradicionais cos que sempre traballa a Xunta-- e redes sociais. A campaña foi presentada este sábado pola secretaria xeral de Igualdade, Susana López Abella.

En Marea cre desacertado o enfoque da campaña porque "non aborda nin as causas da violencia machista, nin o machismo, nin as posibles solucións, nin medidas concretas no ámbito da prevención ou a educación". Deste xeito, opina que "se dá unha visión patriarcal das mulleres" ao "comparalas cuns monumentos, cun patrimonio material que hai que protexer" e, por tanto, "coma se as mulleres fosen cousas ou obxectos sen máis".

"Sinxelamente mostra unha exacerbada cousificación das mulleres, así como un paternalismo patriarcal en grao sumo rancio", indica En Marea no seu comunicado, no que tachan de "superficial" a campaña, xa que "evita intencionadamente abordar a raíz da violencia machista".

"A Xunta non entende a violencia machista"

A través dun comunicado, a 'Marea Feminista' denuncia que a Xunta "segue sen entender o que significa realmente a violencia machista, sacando campañas como esta que nada ten que ver coas reivindicacións" das mulleres.

"As mulleres non somos cousas e non pertencemos a ninguén. Non queremos que nos protexan por ser mulleres, queremos que se garantan os nosos dereitos, así non será necesario que 'nos protexan'. Non queremos ser as máis grandes, queremos ser tratadas igual", conclúe a 'Marea Feminista'.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta