A USC restrinxe as visitas turísticas á Facultade de Xeografía e Historia tras protestas dos estudantes
A Universidade de Santiago regulará as visitas á biblioteca para facilitar o estudo e tarefas de investigación á comunidade universitaria, logo de que os estudantes denunciasen os problemas que lles causan as visitas a este centro.
Por Galicia Confidencial | Samtiago de Compostela | 14/11/2017 | Actualizada ás 14:31
As protestas dos estudantes tiveron efecto. A Universidade de Santiago de Compostela (USC) decidiu restrinxir as visitas á biblioteca da Facultade de Xeografía e Historia, un dos seus elementos patrimoniais máis senlleiros, co fin de facilitar o estudo e tarefas de investigación á comunidade universitaria.
Será unicamente o alumnado e o persoal da USC quen poida acceder á biblioteca, que tamén se mostrará a visitantes alleos á institución a través do programa de Visitas Guiadas ao Patrimonio Histórico da USC que xestiona a propia universidade e que contempla dúas visitas diarias en horarios de baixa incidencia na actividade cotiá do centro, informa a institución académica.
A pasada semana, a organización estudantil Acción Universitaria puxo en marcha a campaña 'Tourist go home, unha USC para os estudantes' para protestar porque a biblioteca da Facultade de Xeografía e Historia da Universidade de Santiago "se ofrece como un obxecto turístico".
Os alumnos dixeron estar "fartos das "molestias" derivadas das visitas durante o seu estudo e, á vez, "numerosas deficiencias" na electricidade e a conexión a internet.
