SANTIAGO DE COMPOSTELA | 16/11/2017 | Actualizada ás 19:49 por EUROPA PRESS
Todos os grupos con representación no Parlamento sumaron este xoves os seus votos para pedir á Xunta que siga poñendo en marcha iniciativas de difusión e conmemoración da figura e a obra de Eduardo Pondal no centenario do seu falecemento.
Este acordo pechouse en comisión parlamentaria a instancias da deputada do PSdeG Dolores Toja, quen propuxo que o Goberno galego subscriba convenios para este fin coa fundación que leva o nome do escritor e poeta de Ponteceso (A Coruña).
Após unha transacción cos outros grupos, o texto que foi aprobado ábrese tamén á colaboración do Executivo autonómico con outras fundacións de escritores do Rexurdimento para programar actividades diversas que permitan pór en valor o seu legado social.
En paralelo, na mesma comisión, o secretario xeral de Cultura, Anxo Lorenzo, respondeu ao deputado do PPdeG Moisés Rodríguez que a promoción exterior da literatura galega é "unha prioridade" para o seu departamento.
Así é que, segundo as súas propias palabras, impúlsase a presenza das principais editoriais e autores nas feiras máis importantes de todo o mundo, así como en numerosas actividades de divulgación que se programan tanto en Galicia como no estranxeiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.