(AM)Os servizos de emerxencias atenden 77 incidencias no inicio do primeiro temporal do outono en Galicia

O Centro Integrado de Atención ás Emerxencias do 112-Galicia rexistrou, entre as 9,00 horas e as 18,00 horas deste mércores, un total de 77 incidencias relacionadas co episodio de meteoroloxía adversa por verto.

Segundo informou o 112, a caída de árbores ou ramas ás estradas foi o incidente máis frecuente, aínda que tamén se rexistraron avisos pola presenza doutros obxectos nas vías, por postes danados ou pola caída de carteis ou sinais de tráfico á calzada.

A provincia máis afectada é a da Coruña, onde se contabilizaron 26 incidentes. A continuación, séguelle a de Pontevedra, con 25. Na provincia de Lugo e produciron 20 incidencias e na de Ourense, 6.

Por concellos, destaca o de Vigo, onde se produciron 8 incidentes. De feito, na cidade olívica produciuse a única vítima polo momento deste episodio, unha persoa á que caeron encima os cristais dunhas xanelas rotas.

Á primeira hora da tarde, tamén en Vigo, o vento tiraba un valado que pechaba unha parcela en Coruxo.

Por outra banda, a caída de árbores ou ramas condicionou a circulación en numerosos puntos da rede viaria galega. Entre outros, cabe destacar a caída dunha rama na A-6, no quilómetro 590, no carril dereito en sentido Madrid. Varias persoas alertaban da situación ao 112 ao redor das 17,00 horas.

En Santiago, a caída dunha árbore nunha vía de servizo en Conxo provocou danos en varios coches que estaban estacionados á beira da calzada, obrigando tamén ao corte do carril. Tamén na capital galega, outra árbore provocou o corte da AC-462 ás 17,30 horas, na zona de Berdía.

PROBLEMAS NOS VOOS

O temporal causou, así mesmo, problemas no ámbito aéreo. Así, dous voos procedentes de Madrid que tiñan previsto as súas aterraxes nos aeroportos da Coruña e Santiago regresaron a Barallas ao non poder aterrar debido ás condicións meteorolóxicas, xa que Galicia atópase en situación de alerta por fortes ventos.

Concretamente, tenderon que regresar ao aeroporto Adolfo Suárez-Barallas os voos de Iberia da tarde do mércores. No caso da Coruña, ademais, quedou cancelado o voo que iría de regreso á capital española, segundo informaron a Europa Press fontes de Aena.

Do mesmo xeito, o transporte de ría entre Vigo e Cangas e Moaña foi suspendido desde as 17,30 deste martes debido ao temporal que entrou na Comunidade galega e que, até pasadas as 18,00 horas, deixou máis de 250 raios.

Segundo informaron a Europa Press fontes das navieras, o transporte regular, que afecta o transporte de persoas a ambos os dous lados da ría viguesa, quedou suspendido até novo aviso.

No que vai de día, contabilizáronse máis de 250 raios na Comunidade galega. Ademais, Cedeira rexistrou un refacho de 127 quilómetros por hora.