Restablecido o transporte de ría de Vigo, que funciona con normalidade desde primeira hora da mañá

O transporte de ría en Vigo foi restablecido e funciona con normalidade desde primeira hora deste xoves, despois de suspenderse o servizo na tarde do mércores polas condicións climatolóxicas adversas.

Segundo confirmaron as navieras a Europa Press, os barcos están a viaxar con normalidade desde primeira hora da mañá entre o porto de Vigo e os de Cangas e Moaña.

O servizo quedou suspendido a partir das 17.30 horas do mércores, despois do o aviso de Capitanía Marítima polos fortes refachos de vento e as malas condicións do mar. Debido a esa suspensión deixaron de realizarse 14 viaxes entre Vigo e Moaña (e viceversa), e case unha vintena de viaxes entre Vigo e Cangas (e viceversa).

Por outra banda, o temporal de vento e choiva deixou algúns danos materiais na cidade de Vigo, segundo informaron fontes de Policía Local. Así, a maior parte dos incidentes rexistrados debéronse a caídas de ramas ou árbores, e desprazamento de colectores que, nalgúns casos, provocaron danos en vehículos.

A Policía Local tamén informou da caída dun muro en Ricardo Mella, de danos no muro do colexio Villalaura, ou da caída de cristais dun edificio da rúa Roupeiro, que ocasionaron lesións a un viandante.