O PPdeG acusa á oposición de "romper o consenso" contra a violencia machista para tentar "desgastar" á Xunta

O secretario xeral do PPdeG, Miguel Tellado, acusou á oposición de "romper o consenso" existente contra a violencia de xénero para tentar "desgastar" ao Goberno galego. "Cremos que hai temas que merecen altura política e certos partidos neste punto equivócanse", asegurou.

O dirixente popular pronunciouse deste xeito nunha rolda de prensa na que tamén participou a coordinadora de Igualdade do PPdeG, Susana López Abella, para dar conta das iniciativas postas en marcha polos populares galegos con motivo da celebración, este 25 de novembro, do Día internacional contra a violencia machista.

Na súa intervención, Tellado considerou que, neste asunto, o "importante" sería "estar unidos para acabar coa problemática da violencia". "Só temos un inimigo, que son aqueles que exercen a violencia", subliñou o secretario xeral do PPdeG.

Neste sentido, referiuse ás críticas recibidas á campaña posta en marcha pola Xunta para conmemorar esta efeméride. Respecto diso, asegurou que, aínda que hai campañas que poden gustar máis ou menos, non lle gustaría ver como o seu parido "critica" unha iniciativa que busca, "coa mellor das intencións", "terminar coa violencia machista".

"OBXECTIVO PRIORITARIO E IRRENUNCIABLE"

Pola súa banda, a tamén secretaria xeral de Igualdade da Xunta de Galicia, Susana López Abella, afirmou que a violencia de xénero é un asunto de Estado que afecta a toda a sociedade polo que "pór fin a este problema é un obxectivo prioritario e irrenunciable". Ademais, incidiu na "importancia" do consenso que, segundo indicou, "debe trasladarse de forma urxente ao ámbito institucional, político e social".

Neste sentido, tamén se referiu ao aumento de casos sobre agresións sexuais que, na súa opinión, estanse "visibilizando" grazas ás denuncias que empezan a coñecerse en distintos ámbitos como o cinema. "Agora hai datos, grazas á sensibilidade dos medios as mulleres si saen a denunciar", manifestou.

Sobre este punto, ademais, mostrouse partidaria de que os xulgados específicos de violencia de xénero asuman tamén casos de agresións sexuais e lembrou que a lei galega sobre esta materia é "pioneira" en contemplar esta cuestión.

Nesta materia, tamén destacou as xornadas sobre igualdade realizadas polo PPdeG no catro provincias galegas, destinadas a afiliados, simpatizantes e cargos do PP nas que, como sinalou, escóitase ás vítimas e aos profesionais que traballan neste ámbito. Ademais, aproveitou para enviar unha mensaxe a todas as vítimas de que "hai saída" e que confíen no sistema "porque cada día se dan pasos máis importantes para mellorar".

DEBATE CO BNG

Preguntada sobre as discrepancias que suscitaron as declaracións do presidente da Xunta, Alberto Núñez Feijóo, o pasado mércores cando, en sede parlamentaria, destacou que el e os seus serán "implacables" contra os "terroristas que seguen asasinando mulleres" e, despois de apelar á unidade e asegurar que só pode haber "dous bandos" --o dos asasinos e maltratadores e as mulleres vítimas--, pediu ao BNG aclarar a súa postura. "Vostede dígame en que bando está", espetou a Pontón.

Sobre este punto, López Abella lembrou que o propio Feijóo pediu onte "desculpas" a quen puidese sentirse "ofendido" e defendeu, ademais, a actuación tanto do presidente como do vicepresidente da Xunta na loita contra a violencia de xénero en Galicia.