Por E.P. | SANTIAGO DE COMPOSTELA | 25/11/2017 | Actualizada ás 15:02
A portavoz nacional do BNG, Ana Pontón, convidou ao presidente da Xunta, Alberto Núñez Feijóo, a definir de "que lado está" en materia de financiamento autonómico: "En que bando está? A favor de Galicia ou ao lado de (Mariano) Rajoy e (Cristóbal) Montoro?", cuestionouse.
Pontón compareceu ante os medios ao termo do Consello Nacional celebrado na mañá deste sábado pola formación frontista, marcado polo debate sobre o modelo de financiamento autonómico.
Este sistema, segundo explicou a líder nacionalista, fai perder anualmente "3.400 millóns de euros" a Galicia, xa que a comunidade galega achegou "vía impostos 11.131 millóns de euros" e recibiu de mans da Administración central "7.043 millóns" no último exercicio.
Fronte a isto, Pontón cargou contra a "submisión" de Feijóo ao ministro de Facenda, Cristóbal Montoro; á vez que acusou ao dirixente autonómico de "non ter ningunha proposta" para mellorar o sistema de financiamento de Galicia.
Así mesmo, fixo referencia ao tenso cruzamento de palabras que mantivo esta semana con Núñez Feijóo durante un debate plenario sobre violencia machista no que o popular chegou a cuestionar á nacionalista "en que lado estaba", se no das vítimas ou no dos agresores.
"Ao señor Feijóo, que tanto lle gusta falar de bandos, hai que dicirlle que no debate sobre un novo modelo de financiamento autonómico só hai dous bandos: Ou se defenden os intereses dos galegos e das galegas ou se defenden os intereses de Rajoy e de Montoro", espetou.
CONCERTO ECONÓMICO
Deste xeito, o BNG denuncia que o actual modelo "non é suficiente" para manter os servizos públicos "básicos", polo que aposta por desenvolver un "concerto económico" que, segundo Pontón, permitiría "recadar o 100 por cen" dos ingresos que se xeran en Galicia para, a posteriori, "facer contas co Estado".
"Queremos saber que propón a Xunta", incidiu, para logo emprazar ao Goberno galego a que envíe a súa proposta de modelo á Cámara para que poida ser avaliada polos grupos parlamentarios.
"Un concerto económico daría a Galicia máis de 3.000 millóns de euros adicionais cada ano para financiar os servizos sociais e facilitar a creación de emprego", remarcou Pontón, que convidou ao PP e ao PSOE a apoiar "para Galicia" o mesmo concerto que apoia no Congreso "para Euskadi e Navarra".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.