A Xunta, condenada por negarse a facilitar documentación sobre o proxecto mineiro de Corcoesto

A Sección Terceira da Sala do Contencioso-Administrativo do Tribunal Superior de Xustiza de Galicia (TSXG) condenou á Xunta pola negativa a facilitar documentación en relación co proxecto da mina de Corcoesto. Con data do 23 novembro deste ano, o TSXG dá a razón a un membro da plataforma Contraminacción a ter dereito a obter copia de documentos solicitados en 2012 sobre o proxecto mineiro. O fallo non é firme e contra el cabe recurso de casación.

Deste xeito, o TSXG anula as resolucións da Xunta por consideralas "contrarias a dereito" e dá a razón ao demandante a ter acceso aos documentos solicitados. Por iso, condénase á Administración galega a expedir copia ao solicitante.

Neste sentido, a Sala remarca "o dereito lexítimo" dos cidadáns a ter acceso aos documentos que "obren nos arquivos adiministrativos" no suposto de que teña "intereses lexítimos relacionados co caso", cuestión que fixa que "nin sequera pode discutirse de ningún xeito" ao ser veciño afectado da contorna da mina.

Ademais, a sentenza lembra que hai supostos nos que é lícito que a administración non achegue eses expedientes, como cando afecta á intimidade das persoas ou materias protexidas, "pero en ningún destes casos" atópase esta petición.

PETICIÓNS DENEGADAS

En 2012, o demandante solicitou diversas documentación relativa ao proxecto --como a vixencia dos dereitos mineiros--, o cal lle foi denegado en abril de 2013 polo xefe de servizo de Enerxía e Minas da Coruña da Consellería de Economía e Industria. Após diso, o afectado presentou un recurso que foi desestimado por silencio administrativo.

Así, a Xefatura Territorial consideraba que non procedía a solicitude de acceso a eses expedientes, xa que non foran obxecto de publicidade, aínda que se indicaba que os dereitos mineiros estaban vixentes e con titularidade de Mineira de Corcoesto.

Posteriormente, en 2015 o secretario xeral técnico da Consellería de Industria ratificou o rexeitamento da Xunta a facilitar eses expedientes ao desestimar tamén o recurso de alzada presentado.

A sentenza fixa que as razóns da primeira resolución do Goberno galego de 2013 para rexeitar o acceso a esta información "son totalmente insuficientes e inaceptables". De feito, fállase que a Administración autonómica emprega un "mero subterfuxio" como dicir que o interese por un expediente "non se podía estender aos expedientes anteriores" ou escudarse na intimidade das persoas cando "nada se xustificaba en relación a isto".

CONTRAMINACCIÓN LAMENTA A DILACIÓN

Pola súa banda, Contraminacción valora que o TSXG dea a razón a este afectado, pero lamenta que a sentenza chegue "máis de cinco anos" despois do caso.

"É lamentable que esta sentenza chegue con tantos anos de atraso", sostén Contraminacción, pois esta "tardanza na aplicación da xustiza" fai que se vexan "privados dese mesmo dereito"

E é que a Xunta ditou en 2014 a resolución de denegación definitiva do proxecto da mina de Corcoesto, na comarca de Bergantiños, presentado pola empresa Mineira de Corcoesto, filial da canadense Edgewater.

"De que nos serve o dereito de acceder a documentos relacionados cun proxecto se se nos concede cinco anos despois da súa solicitude?", critica. Así mesmo, pregúntase "que levou á administración a ocultar o estado das concesións durante tanto tempo" e a "obstaculizar" o acceso a esa información.

Con todo, espera que este fallo "sirva de acicate para que a administración non volva reter información que debe ser pública", e, "no caso de facelo, que a Fiscalía Anticorrupción tome as oportunas medidas para depurar as responsabilidades que puidese haber".