Catro meses de cárcere para o septuaxenario que ameazou cunha escopeta de caza a un operario da ITV de Narón

O Xulgado de Instrución Número 2 de Ferrol, en funcións de garda, acolleu este mércores un xuízo rápido no que un veciño de Moeche (A Coruña) de 75 anos foi condenado a catro meses de cárcere por un delito de ameazas a un operario da ITV de Narón.

O home foi condenado por mostrar este martes unha escopeta de caza a un traballador da empresa Supervisión e Control (SyC) de Narón, após non superar o seu vehículo, un todoterreo, a Inspección Técnica de Vehículos.

Na sentenza de conformidade incluíuse que a pena de prisión quedará suspendida no caso de que o septuaxenario non delinca nos dous próximos anos.

Ademais, estableceuse unha orde de afastamento de 50 metros, tanto para o establecemento no que se produciu o incidente, a estación de supervisión situada no polígono da Gándara, como para os empregados ameazados, que tamén estará vixente durante 24 meses.

En caso de cumprir todos estes requisitos, o septuaxenario condenado non terá que entrar en prisión.