Por E.P. | Santiago de Compostela | 30/11/2017 | Actualizada ás 15:22
O xurado do 'I Premio Stephen Hawking de xoves investigadores Rosalía-Abanca' valora un total de 12 traballos finalistas de alumnos de catro centros galegos, entre os que se atopan temáticas tan dispares e diversas como estudos para mellorar a mina de Touro, a presenza de microorganismos nos teléfonos móbiles ou o alimento da curuxa galega, entre outros.
Un certame que busca incentivar a vocación científica dos mozos nas etapas previas á universidade e que tenta consolidarse "como o gran premio" neste ámbito nos institutos galegos, en palabras do director do IES Rosalía de Castro de Compostela, Ubaldo Rueda.
Así o sinalou en rolda de prensa celebrada este xoves no propio centro, na que os membros do xurado valoraron a calidade e orixinalidade dos traballos presentados. Precisamente, o director do Rosalía valorou "a altura extraordinaria" da composición deste xurado, entre os que se atopan o exreitor Carlos Pajares ou Ignacio M. Mendizábal, Premio Príncipe de Asturias.
Isaac González, director de Comunicación e Relacións Institucionais de Abanca, destacou a importancia de que Stephen Hawking, "unha personalidade científica de primeiro nivel", ceda o seu nome para este galardón, que busca transmitir valores do ámbito científico, como a "curiosidade", a "persistencia" e a "humildade".
O salón de claustros do centro foi o escenario polo que pasaron ao longo desta mañá os diferentes finalistas do certame para presentar os seus proxectos ao xurado, procedentes do IES A Pinguela de Monforte, Pintor Colmeiro de Silleda, Xelmírez I e o propio Rosalía de Castro de Santiago.
Sobre os proxectos, Carlos Pajares valorou a "espontaneidade de todos os traballos", que parten de "ideas simples" pero "elaboradas con metodoloxía científica", nos que os mozos plasmaron a súa "curiosidade". Nesta liña, Mendizábal destacou "o éxito" da proposta, na que constatou "moito talento e moito corazón" por parte dos alumnos.
POTENCIAL CIENTÍFICO
O profesor Jesús Jordá destacou a importancia do desenvolvemento deste "potencial" nos mozos nas etapas previas á universidade, e incidiu na necesidade de que estas iniciativas se implanten "de maneira reglada" no proceso escolar.
Tamén formaron parte deste xurado Alejandro Rivero e Marta Pita, dúas exalumnos do Rosalía e que enfocaron a súa traxectoria e a súa formación como investigadores.
Rivero mostrouse "cegado" pola creatividade plasmada polos estudantes, a quen desexou "unha longa e próspera" carreira profesional, mentres que Marta Pita situou algún dos proxectos ao nivel da investigación universitaria.
O fallo do xurado darase a coñecer nun acto ás 19.30 horas no propio IES Rosalía de Castro, no que tamén se lle entregarán as insignias de ouro a Carlos Pajares, ao exalcalde Agustín Hernández e ao propio Jesús Jordá.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.