Ponte Caldelas acusa á Xunta de iniciar os traballos do Verdugo sen autorización

O Concello de Ponte Caldelas (Pontevedra) abriu expediente sancionador contra a empresa encargada de realizar as medicións topográficas para o proxecto de transvasamento provisional no río Verdugo, e axentes da Policía Local identificaron este mesmo luns a traballadores da devandita empresa, segundo confirmaron fontes municipais.

O goberno local de Ponte Caldelas, a través dun comunicado, ven de informar que o alcalde do municipio, o socialista Andrés Díaz, e varios axentes presentáronse este luns nun viario municipal, no lugar da Roca, onde constataron que se estaban facendo medicións topográficas sen autorización do Concello.

Así, ao entender que se trata dun uso "intensivo ou extraordinario" das vías públicas sen ter permiso, levantouse acta e identificouse aos operarios. O expediente vai inicialmente dirixido contra a empresa pero, advertiu o Concello, "podería acabar dirixido directamente contra a Consellería de Medio Ambiente, unha vez constatada a identidade da administración contratante" dos traballos.

Por outra banda, o alcalde tachou de "delirante" que estes operarios estivesen acompañados por unha dotación da Policía Autonómica, e criticou á Xunta por "comprometer" a funcionarios públicos nunha actuación "supostamente irregular".

O alcalde Andrés Díaz avanzou que pedirá explicacións sobre este episodio ao director de Augas de Galicia, Roberto Rodríguez, co que se reunirá este mesmo martes. Segundo sinalou, "non resulta admisible" que a Xunta envíe operarios a "ocupar" propiedades municipais sen ter autorización, custodiados pola Policía Autonómica, "máis aínda cando a xente de Ponte Caldelas é pacífica e respectuosa, e só limitouse a dicirlle a estes operarios que non entrasen nas súas leiras".