Feijóo subliña que a Xunta "está a pagar" a autovía do Morrazo e non o repercutirá en peaxes, como pasará con Rande

O presidente da Xunta, Alberto Núñez Feijóo, subliñou este mércores que a Administración autonómica "está a pagar" a obra de conversión do corredor do Morrazo en autovía, e non o repercutirá en ningunha peaxe, como si se fará coa AP-9, logo das obras de ampliación en Rande e en Santiago.

Así o manifestou nunha intervención ante os medios após realizar unha visita ás obras desta infraestrutura, na que a Xunta investirá uns 55 millóns de euros. "Ademais de construíla, estamos a pagar esta autovía, e estamos a evitar peaxes en autoestradas e autovías galegas", sinalou.

Segundo engadiu, o Goberno galego evita así deixar "hipotecadas as contas públicas para o futuro" e recalcou que non lle pedirá aos cidadáns "que paguen esta autovía a través da peaxe, como se lles pide que paguen a ampliación de Rande e outros tramos", en alusión ao convenio asinado en 2011 polo goberno socialista e Audasa, que permite á concesionaria repercutir o custo das obras cun incremento do 1 por cento anual da tarifa durante 20 anos.

Deste xeito, insistiu, a Xunta vai pagar "na súa integridade" a obra e "non se vai a deixar a deber", porque "logo hai discusións sobre como é posible que as infraestruturas non se paguen, pois é porque non se pagaron no seu momento e hai que pagalas despois".

Pola súa banda, o vicepresidente da Xunta, Alfonso Rueda, tamén se pronunciou sobre as peaxes e, en resposta a preguntas dos medios, admitiu que o incremento anunciado para 2018 (de case o 4 por cento) na AP-9 "non é unha boa noticia". "É consecuencia dos acordos que no seu día se adoptaron para facer as obras, e agora aplícanse e repercútense. É o acordado desde hai anos (...) era xa coñecido", puntualizou.

Á marxe do 1% por ese convenio, da subida total, un 0,9% correspóndese coa bonificación aos vehículos que realizan o percorrido entre Pontevedra e Vigo, ida e volta no mesmo día de luns a venres. O resto da subida, correspóndese co cálculo do IPC.

"COORDINACIÓN"

Por outra banda, Núñez Feijóo destacou tamén a "coordinación" entre Xunta de Galicia e Ministerio de Fomento na execución das obras de ampliación de Rande e as da autovía, e lembrou que, segundo os prazos previstos, no primeiro semestre de 2018 estarán operativos, tanto os novos carrís da autoestrada como os primeiros 7 quilómetros da autovía do Morrazo.

O presidente galego destacou que a conversión do corredor suporá "un despois na mobilidade da zona", tendo en conta que este viario soporta unha intensidade media de tráfico de 13.000 vehículos, que chega até os 20.000 diarios en período estival. Ao seu xuízo, o conxunto dos traballos levados a cabo pola Xunta e pola concesionaria Audasa (cun investimento total de 200 millóns) supoñen "a transformación máis complexa dos últimos 35 anos" en termos de tráfico e mobilidade.

PRAZOS

Logo da visita ás obras do corredor, Feijóo constatou que os traballos van sobre os prazos previstos e que, en maio de 2018, abriranse ao tráfico os primeiros tramos da nova autovía, entre a ligazón de Rande e o de Meira. O último tramo adxudicado, o que chegará até a ligazón de Cangas, podería entrar en servizo a mediados de 2019.

O presidente galego destacou que, nestes momentos, o 60 por cento das obras nos subtramos 1 e 2 está finalizado, e que se acabaron ou están a piques de acabarse os traballos nas partes máis complexas, como son os viadutos.

Así mesmo, puxo en valor a cooperación das "autoridades locais" e o diálogo cos municipios afectados que permitiu, entre outros acordos, decidir a modificación do proxecto inicial para preservar o castro de Montealegre. Para iso, optouse por unha solución de gran complexidade técnica, como foi a ampliación do actual túnel, ensanchándoo até os 20 metros.