Un proxecto da Deputación de Lugo desenvolverá un rural sustentable no Xistral con fondos da UE
Os propietarios recibirán compensacións económicas se acadan obxectivos nunha iniciativa a cinco anos con dous millóns de investimento
SANTIAGO DE COMPOSTELA | 14/12/2017 | Actualizada ás 15:58 por EUROPA PRESS
O proxecto 'Life in Common Land', da Deputación de Lugo en colaboración coas universidades de Santiago e A Coruña (USC e UDC), levará a cabo "medidas que garantan un desenvolvemento sustentable" na Serra do Xistral, co obxectivo de conseguir a máxima rendibilidade deste espazo catalogado como Rede Natura e reserva da biosfera Terras do Miño.
Esta iniciativa terá unha duración de cinco anos e conta cun investimento de dous millóns de euros, financiado no 70 por cento por fondos europeos (1,4 millóns), 212.000 euros da Deputación de Lugo, 198.000 da USC e 100.000 da UDC.
O proxecto desenvolverase nun espazo de 5.000 hectáreas na Serra do Xistral, nos municipios de Abadín, Muras, Ourol, Valadouro e Viveiro, dentro de Rede Natura e que contan "con restricións de uso e aproveitamento do territorio, impostas pola propia normativa vixente". Contará coa participación directa dos propietarios e usuarios dos montes veciñais.
Así o destacou o presidente da Deputación de Lugo, Darío Campos, quen subliñou que se buscarán "medidas que garantan un desenvolvemento sustentable da zona e redunden na mellora de produción gandeira e forestal, na axilización de trámites e aspectos administrativos, así como na conservación do rural, dotándoo de oportunidades".
Á presentación do proxecto asistiron ademais do presidente da Deputación, o vicerreitor de Desenvolvemento Científico e Tecnolóxico do Campus de Lugo da USC, Andrés Barreiro Lois; o adxunto ao vicerreitor de Política Científica da Universidade da Coruña, Horacio Naveira Fachal, e o deputado de Cooperación cos Concellos, Argelio Fernández Queipo.
COMPENSACIÓNS ECONÓMICAS
Os encargados de executar estas medidas serán os usuarios e propietarios, que recibirán compensacións económicas se conseguen os obxectivos fixados.
Deste xeito, a Deputación de Lugo, a USC e a UDC converteranse "nas primeiras administracións en España que premien economicamente o desenvolvemento sustentable", asegura Campos.
En concreto, este é un modelo que xa se aplica noutros países europeos, por exemplo Francia, para combater o despoboamento demográfico e conservar o medio ambiente.
Un proxecto que ten como fin "demostrar que é compatible o desenvolvemento económico e social do rural en zonas de especial protección con restricións lexislativas en canto ao seu emprego e aproveitamento".
