Por Galicia Confidencial | Compostela | 15/12/2017 | Actualizada ás 11:00
A partir de agora todas as axencias de viaxe de Galicia deberán contar cunha garantía económica, un aval, para realizar o seu traballo. Así o aprobou o Consello da Xunta este xoves para actualizar a actual lei á normativa europea.
Deste xeito, a Xunta autorizou a modificación dun artigo do decreto de refundición en materia de axencias de viaxes, guías de turismo e turismo activo co obxectivo de adaptalo ao marco europeo. A modificación refírese ao artigo 16 do Decreto 42/2001, no referente ás garantías que deben constituír as empresas organizadoras ou retallistas de viaxes combinadas para os usuarios.
"A garantía derivada desta modificación proporcionará así máis protección ás persoas usuarias fronte á quebra ou insolvencia das empresas organizadoras e as retallistas de viaxe combinadas, que deberán constituír a dita garantía con carácter previo ao exercicio da súa actividade e mantela de xeito permanente", apuntou a Xunta.
Garantía para os usuarios
Esta garantía permitirá responder ao incumprimento das obrigas derivadas da prestación dos servizos contratados e ao reembolso efectivo dos pagamentos realizados polos viaxeiros na medida en que estes non se prestasen.
Segundo o Goberno galego, o decreto foi sometido ao preceptivo informe do Consello do Turismo de Galicia, así como á consulta das organizacións máis representativas do sector e ao informe do Consello Galego de Consumidores e Usuarios. A súa entrada en vigor será o día seguinte as da súa publicación no Diario Oficial de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.