Por Galicia Confidencial | Santiago de Compostela | 15/12/2017 | Actualizada ás 15:22
Por incrible que pareza, palabras como Samaín —a tradicional festa de orixe celta— ou voces tan actuais e de actualidade como transfobia, brigadista ou eucaliptización non están incluídas no Dicionario da Real Academia Galega. Co próposito de recoñecer os neoloxismos xurdidos ou popularizados este ano, está en marcha un concurso popular en Internet para elixir o Neoloxismo do Ano 2017.
A idea, impulsada por Jorde Diz Pico —cientista computacional e néologo— busca que os galegos escollan unha palabra dunha listaxe de voces, ben porque resulta bonita, porque resume ben o ano ou porque se pense que representa un concepto importante.
As palabras que entran no concurso son as seguintes:
SAMAÍN m. Celebración realizada na noite do 31 de outubro na que se adoita decorar con motivos de mortos, baleirar calacús e repartir doces aos cativos.
EMPODERAMENTO m. Acto de se dotar de ferramentas para vencer os obstáculos propios. Úsase especialmente no caso de grupos sociais en desvantaxe, como as minorías étnicas, LGTB ou as mulleres.
BRIGADISTA m. ou f. Membro dunha brigada. En particular, das forestais que combaten os incendios.
VELUTINA f. Avespa de orixe asiático e patas amarelas considerada especie invasora en Europa.
MICROMECENADO m. Sistema de financiación no que moitos patrocinadores individuais adiantan unha pequena parte do orzamento a cambio de se beneficiaren do resultado final.
TRANSFOBIA f. Prexuízo ou discriminación contra as persoas transxénero.
EUCALIPTIZACIÓN f. Expansión rápida da presenza de eucaliptos nunha área.
XORNALIXO m. Xornalismo de mala calidade, falso ou nesgado.
PANQUEIQUE m. Masa frita en tixola ao estilo americano, que se acostuma comer coberta de doces ou xaropes tales como nata, caramelo ou chocolate.
OSIÑO LAVADOR m. Pequeno mamífero norteamericano coñecido pola súa característica máscara facial e o seu hábito de rapiñar no lixo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.