O Consello Forestal reúnese este luns para avanzar na revisión do plan forestal

O Consello Forestal reunirase este luns, 18 de decembro, para avanzar na revisión do plan forestal de Galicia, nun momento no que acaba de ser constituída a comisión no Parlamento que abordará cambios na política contra incendios na comunidade.

Representantes da Consellería de Medio Rural, do sector, das comunidades de montes veciñais, Asociación Forestal de Galicia, a industria, o Clúster da Madeira, sindicatos e universidade participarán na reunión, prevista para as 11,30 horas.

Na orde do día figuran dous puntos: a actualización do plan forestal, que data de 1992, e a presentación do borrador do decreto polo que se crea e desenvolve o rexistro de masas consolidadas de frondosas autóctonas.

O plan forestal de Galicia do ano 1992 foi un documento básico que estableceu un modelo forestal a longo prazo co fin de manter unha coherencia nas intervencións no monte e nos sectores derivados.

GRUPO DE TRABALLO

O Consello Forestal de Galicia acordou en 2014 crear un grupo de traballo, que naceu, segundo recolle Medio Rural na súa páxina web, para dar resposta a "a demanda da sociedade galega" para que se acorde o modelo de monte no futuro que sirva de "guía" na elaboración da revisión do plan forestal.

En decembro de 2015, o grupo de traballo finalizou o seu traballo e aprobou o texto das directrices por consenso, con abstención do representante de Amigos da Terra.

A conclusión foi que este documento debe considerarse "como o resultado do labor do grupo de traballo no seu conxunto", apunta Medio Rural. Así, o grupo acordou unha serie de recomendacións á Xunta para a redacción da revisión do plan.

VAGA DE INCENDIOS

Após a vaga de incendios do pasado outubro, que calcinou máis de 49.000 hectáreas na comunidade, de novo abriuse o debate en Galicia sobre a ordenación do monte e cales han de ser as políticas forestais que aplique a Xunta.

Un dos puntos sempre candente, o da superficie plantada de eucalipto, volveu ser denunciado por grupos políticos e asociacións ecoloxistas, que critican que, aínda que o plan forestal de 1992 fixaba un tope de 245.000 hectáreas para o horizonte de 2032, a data de 2017 o dato elévase por encima das 400.000 hectáreas.

Entre as 30 medidas que anunciou o titular do Goberno galego, Alberto Núñez Feijóo, como reacción ao ocorrido o 15 de outubro (cando os lumes provocaron catro mortes na comunidade), figura a prohibición de plantar eucalipto, piñeiro e acacia (especies pirófilas) nos perímetros de 50 metros ao redor dos núcleos poboados.