CCOO Galicia ve nos orzamentos da Xunta unha "oportunidade perdida" para trasladar a recuperación aos galegos

O secretario xeral de CCOO Galicia, Ramón Sarmiento, considerou que os orzamentos para 2018 que o Partido Popular prevé aprobar esta semana no Parlamento autonómico supoñen unha "oportunidade perdida" para trasladar a recuperación aos petos dos galegos.

Nunha entrevista concedida a Radio Nacional España (RNE), recollida por Europa Press, Sarmiento asegurou que Galicia vai acabar o 2017 cuns niveis de emprego e uns datos de investimento público que "non son os adecuados". Por iso, cre que a Xunta debería "reforzar" o actual escenario de crecemento macroeconómico con "un orzamento máis expansivo".

Con todo, Sarmiento mostrouse "escéptico" sobre a posibilidade de que o Partido Popular incorpore algunha das emendas formuladas polos grupos da oposición neste sentido. "A experiencia demóstranos que o PP é pouco receptivo a incorporar propostas que teñan certo contido", sinalou.

E é que, segundo criticou, a Xunta "nin ten ningunha intención de cambiar o que eles entenden que é un modelo de éxito". Respecto diso, asegurou que aínda que a xestión dos populares ten a súa "transferencia mas cifras macro" é difícil que "acaben traducíndose nun escenario de benestar social na Comunidade".

CAÍDA DEMOGRÁFICA

Na súa intervención, o secretario xeral de CCOO Galicia tamén se referiu á caída demográfica que rexistra a Comunidade galega. Para porse solución, defendeu unha "alternativa tanto de modelo económico como de modelo social" que permita á mocidade galega "ter esperanza".

"Un 50% dos menores de 35 anos están en desemprego, os que traballan fano en precario...", censurou o sindicalista, que pide o compromiso conxunto dos "axentes sociais e económicos" para dar unha saída á xente nova.

Ademais, tamén se mostrou partidario de incrementar o salario mínimo interprofesional a través dunha "regulación distinta". "O Goberno di que o vai a subir pero non sabemos se o que pedimos os sindicatos, que é que se sitúe no 60% do salario medio", apuntou.