A Vía da Prata recibe a homologación oficial como primeira ruta ecuestre xacobea

A Vía da Prata recibiu esta fin de semana a homologación oficial como primeira ruta ecuestre certificada do itinerario xacobeo por parte da Real Federación Hípica Española, que a identificou baixo o código IE-016.

Así o informou a Xunta nun comunicado emitido aos medios este domingo no que apuntou a un incremento do 20% no número de peregrinos que chegan á Comunidade galega montados a cabalo, que superan xa os 400.

A peregrinación a cabalo é unha das tres opcións contempladas pola Oficina do Peregrino para obter a Compostela, sempre que se percorran como mínimo os últimos 100 quilómetros da ruta. Grazas á homologación, a Xunta manifestou o seu desexo de que "a evolución continúe sendo positiva nos próximos anos".

Para completar este recoñecemento, Turismo de Galicia adiantou que Santiago contará desde o próximo ano cun espazo de acollida de peregrinos a cabalo, situado no renovado parque de Monte do Gozo.

ACOLLIDA DA PRIMEIRA RUTA ECUESTRE XACOBEA

Esta nova ruta ecuestre, ao seu paso polos municipios da Gudiña e Laza, foi realizada entre o sábado e o domingo por un grupo de xinetes procedentes da Asociación Pura Raza Cabalo Galego (Boqueixón), da Asociación Ecuestre Cabaleiros de Brión, Xinetes de Noia, Xinetes de Villestro, Club Hípico Pura Raza Galega (Ames), do Centro Ecuestre El Paso (Castro de Ribeiras de Lea) e de Hípica Ares (Vilagarcía de Arousa).

Na iniciativa participaron tamén representantes da Federación Hípica Galega. Así mesmo, a directora de Turismo de Galicia, Nava Castro, acompañada da delegada territorial da Xunta en Ourense, Marisol Díaz Mouteira, estiveron presentes no paso do percorrido polo Concello de Laza.

PLAN DIRECTOR DO CAMIÑO DE SANTIAGO

A homologación da ruta ecuestre era un dos obxectivos incluídos no Plan director do Camiño de Santiago da Xunta, que contén accións para "diversificar os fluxos de peregrinos" e "especializar os diferentes itinerarios", ademais de "pór en valor as súas singularidades", tal e como sinalou o Goberno galego.

Neste sentido, Turismo de Galicia asegurou que "grazas a este plan", a Vía da Prata, en liña co resto de rutas xacobeas, incrementou este ano o seu número de peregrinos e xa supera os 9.000, o que representa máis do 3% do total de camiñantes.