Por Galicia Confidencial | Ourense | 18/12/2017 | Actualizada ás 17:45
Seis municipios da fronteira entre Ourense e Portugal potenciarán a súa riqueza termal a través do proxecto Raia Termal, unha iniciativa conxunta entre Galicia e Portugal que conta cun orzamento de 2,7 millóns de euros, dos que o 75% será aportación dos fondos Feder da Unión Europea.
A iniciativa foi concebida en marzo do 2015 e ten a participación da Confederación Hidrográfica do Miño-Sil; a Deputación de Ourense; os concellos ourensáns de Bande, Cortegada, Lobios e Muíños, e os municipios portugueses de Melgaço e Terras de Bouro.
Durante os próximos dous anos, este territorio entre Galicia e Portugal beneficiarase dunha serie de accións para recuperar os seus recursos termais e paisaxísticos, coa intención de converter a fronteira luso-ourensá nun atractivo para o turismo.
O proxecto de 2,7 millóns de euros será cofinanciado nun 75% pola Unión Europea. As actuacións restantes serán realizadas polas distintas administracións galegas involucradas (70%) e polas Cámaras portuguesas (30%).
A presentación desta iniciativa tivo lugar este luns nas instalacións do Centro Cultural Marcos Valcárcel da Deputación de Ourense, con motivo dunha xornada organizada polo xornal La Region de Ourense. O acto contou coa participación do presidente da Deputación, Manuel Baltar; do presidente da Confederación Hidrográfica do Miño-Sil (CHMS), Francisco Marín e da Secretaria de Estado de Portugal, Ana Mendes.
Baltar explicou que Raia termal inclúe a recuperación de zonas térmais, a creación de prazas de aparcamento para caravanas, o tratamento de augas residuais e o condicionamento de sendas peatonais nas concas dos ríos Miño e Limia. Asemade, incidiu na necesidade de "involucrar" os habitantes da raia a través de "plans de divulgación, formación e información" para que "fagan seu" o proxecto.
Pola súa banda, o presidente da CHMS, Francisco Marín, defendeu a necesidade de "estructurar un territorio transfronteirizo europeo ao redor do termalismo". Tamén destacou que este proxecto, con apoio da UE, "servirá para mellorar a calidade e bo estado das augas" dos ríos Miño e Limia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.