SANTIAGO DE COMPOSTELA | 19/12/2017 | Actualizada ás 15:36 por EUROPA PRESS
O acusado de abusar sexualmente dunha muller en Monforte (Lugo), á que coñeceu nun bar do Malecón, negou que abusase dela e declarou no xuízo que a relación foi consentida e que o pasaron "ben". Mentres, a suposta vítima o negou e mantivo a acusación.
A Sección Segunda da Audiencia Provincial de Lugo acolleu a celebración do xuízo, a pesar de que se barallou a posibilidade de chegar a un acordo que finalmente non se alcanzou. A Fiscalía pide dez anos e medio por un delito de abusos sexuais, en tanto que a acusación eleva a petición a doce anos e a defensa reclama a libre absolución.
Os feitos xulgados sucederon en xullo de 2014, cando a parella se coñeceu nun bar en Monforte e el ofreceuse a acompañala á súa casa, nunha parroquia de Lemos, aínda que finalmente acabaron nun "escampado" onde supostamente se produciron os absusos.
O acusado, V.P., de 58 anos e nacionalidade portuguesa, sostivo que durante o encontro no bar estiveron a conversar sobre as súas "vidas", e que, incluso a muller, comentoulle que era viúva e que "non" tivera relacións desde facía tempo.
Ademais, mantivo durante a vista que a vítima bebeu alcol, "cubalibres" e que estaba "borracha". "Daba aspecto de estar borracha", manifestou. Noutro momento do interrogatorio, dentro do consentimento, esgrimiu que ela até saíu do coche, onde se produciron os feitos, para desvestirse e logo entrou no vehículo, sendo no asento do copiloto onde se tivo a relación.
Tamén advertiu de que a zona onde mantiveron as relacións é un lugar ao que adoitan acudir as parellas. Após os feitos, si que recoñeceu que a muller se puxo un pouco nerviosa porque lle faltaba o móbil.
NEGOU HABER BEBDIDO
Fronte a iso, a denunciante, que negou beber ese día, relatou que tentou zafarse do presunto agresor propinándolle un golpe co xeonllo, pero este pegoulle "hostias na cara". Segundo dixo, chegou a pensar que a podía matar "aí", dado que a colleu "moitas veces polo pescozo".
A pesar de opor resistencia finalmente consumouse a agresión sexual, e, posteriormente, o que máis estrañou á vítima é que cando a conducía de volta a casa a trataba "coma se" fosen "marido e muller, todo cariñoso". "Algo que se non se ve non se cre, despois de tanto dano", expuxo.
A avogada da acusación particular, María José González Rodríguez, concretou antes de entrar na sala que reclaman, á súa vez, sete anos de afastamento, ademais de máis de 50.000 euros de indemnización e os doce anos de prisión para o acusado.
En canto á súa clienta, comentou que "está nerviosa, para ela é importante pasar isto dunha vez". "Quere pasar páxina", sinalou. A avogada, finalmente, destacou que a muller "non dorme ben, e ten algunhas cousas que se produciron por mor de sufrir os feitos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.