Por E.P. | SANTIAGO DE COMPOSTELA | 19/12/2017 | Actualizada ás 21:29
Os deputados do PPdeG rexeitaron cos seus votos a toma en consideración dunha iniciativa lexislativa popular (ILP) encamiñada a promover o uso do galego no ámbito socioeconómico e que, a pesar de contar co apoio do resto de grupos que compoñen o arco parlamentario autonómico --En Marea, PSdeG e BNG--, non se tramitará no Parlamento de Galicia.
Tanto Luís Villares (En Marea), como Concepción Burgo (PSdeG) e Olaia Rodil (BNG), ratificaron o apoio dos seus grupos a esta iniciativa "de xustiza". Con todo, o parlamentario popular César Fernández Gil esgrimiu que os dereitos lingüísticos xa están garantidos "en igualdade de condicións" no actual marco normativo para os usuarios.
Tamén aludiu a medidas adoptadas polo Executivo autonómico como o impulso do plan de dinamización do galego no ámbito económico e engadiu que, lexislar a maiores, podería ocasionar "un efecto contrario" ao buscado. En concreto, Fernández Gil incidiu en que fixar novas obrigacións pola vía normativa, coa correspondente posibilidade de infraccións e sancións, e a necesidade de incorrer en novos custos "que non todas as empresas estarían en condicións de asumir", podería "favorecer o efecto contrario ao desexado e entender como unha obrigación formal o uso do galego".
DEFENSA DA MESA
Previamente, para defender a iniciativa interviñera na cámara galega o presidente da entidade promotora, A Mesa pola Normalización Lingüística, Marcos Maceira, quen lembrou que 28.000 persoas "constataron coa súa firma a vontade ampla" de que os galegos poidan ter "os mesmos dereitos" de calquera lingua oficial no seu territorio.
E é que é no ámbito socioeconómico no que os cidadáns "desenvolven as súas relacións de consumo" e "todas aquelas actividades que precisan para vivir e satisfacer gran parte das súas necesidades". "Actividades, como case todas, que precisan da lingua para informarse, solucionar dúbidas, reclamar os seus dereitos como consumidores ou dar aviso en caso de emerxencia", resumiu.
"Situacións nas que, dunha maneira asfixiante, a nosa lingua está excluída, vetada. Onde o normal é que non estea. Onde non temos liberdade para empregala, simplemente, por non haber opción en galego na atención, documentación ou información", engadiu, a continuación. Non en balde, denunciou que "a liberdade no uso do galego é, no mellor dos casos, condicional e limitada", aínda que "formalmente" o galego é a lingua propia cooficial en Galicia e os poderes "teñen a obrigación de promovela".
"RACISMO LINGÜÍSTICO"
Maceira incidiu en que "a realidade é que hoxe en Galicia é "practicamente imposible facer en galego" actos "tan simples e habituais" como "abrir unha conta, asinar contratos de diferente tipo ou mesmo trámites obrigatorios en entidades públicas como o alta ou a baixa na Seguridade Social ou determinadas xestións coa Axencia Tributaria". "Querer vivir en galego, con toda normalidade, convértenos en estranxeiros na nosa patria", sentenciou.
"A lingua é unha necesidade humana. Recoñecer o dereito á atención en calquera lingua excepto na propia é unha mostra de desprezo ao pobo que a fala. É pretender manter pola forza e pola coacción, un status de subordinación que ben podemos denominar racismo lingüístico", engadiu.
"SAÍR DO ARMARIO LINGÜÍSTICO"
Tras coñecer o rexeitamento do PP, na súa quenda de peche, Maceira deu as grazas aos populares que, segundo revelou, "dentro e fóra da Cámara" trasladaron o seu apoio á entidade e tentaron que o seu partido apoiase esta iniciativa. A continuación, apelou a "saír do armario lingüístico".
Tamén reprobou o "ataque" ao galego que ligou cos sucesivos mandatos do PP e asegurou que confía en que, "cando non dependa do PP", a defensa do galego poderá ser "unha realidade" na comunidade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.