Os aloxamentos rurais galegos son os peor valorados en España
Galicia é, ademais, a quinta autonomía máis cara para o turismo rural, segundo un novo informe do sector.
Por Galicia Confidencial | Santiago de Compostela | 20/12/2017 | Actualizada ás 17:02
Os aloxamentos rurais que oferta Galicia aos turistas son os peor valorados no Estado, cunha nota media de 3,4 puntos sobre 5, segundo o Sétimo Informe do Turismo Rural en España, que elabora clubrural.com.
O informe salienta que a opinión dos turistas cando teñen unha estancia en aloxamentos rurais é positiva, en xeral, cunha valoración media no total de España 4,2 puntos sobre 5 que outorgan tras a viaxe. Con todo, hai comunidades e provincias que destacan por enriba do resto.
Os comentarios fanse respecto de cinco criterios sobre os que os viaxeiros teñen que opinar: calidade/prezo, trato, instalacións, limpeza, confort e situación. En base a isto, xérase unha nota media que permite valorar como é a experiencia dos turistas nestes establecementos.
As comunidades mellor valoradas son Navarra (4,9), Cataluña (4,5) e Castela e León (4,4). No lado oposto, aparecen con menor puntuación Galicia (3,4), A Rioxa (3,6) e Estremadura (3.6).
CLASIFICACIÓN POR PREZOS
No que se refire aos prezos, un ano máis é o arquipélago balear o que ten a media de prezo máis elevada do Estado, con 64,50 euros por persoa e noite. A continuación, a Comunidade de Madrid cunha media de 34 euros, é a segunda, seguida por Cataluña con 30,75 euros de media por persoa e noite, Euskadi con 30 euros e, en quinto lugar, Galicia, con 29,5 euros.
No lado oposto, a comunidade máis económica para practicar turismo rural é como outros anos a Rexión de Murcia, cun custo de media de 22 euros. Aínda que con tres euros de diferenza, en penúltimo lugar atópanse Asturias e Navarra con 25. Pechan este top 5, Aragón (25,6 €) e Andalucía (25,75 €).
