Cal é o mellor equipo de Galicia?
Os Riazor Blues colocan unha pancarta no adestramento do Dépor coa frase de Iago Aspas ‘O Celta é o mellor equipo de Galicia’ e Lucas Pérez responde ao celeste: “A historia está aí, non hai máis que dicir”. O dianteiro deportivista recomenda a Abel Caballero que se preocupe de que “o Celta non se vaia” de Vigo.
Por gcdeportes | | 21/12/2017 | Actualizada ás 19:03
O habitual cando chega unha nova edición do clásico do fútbol galego. Declaracións cruzadas entre os dous bandos, e a eterna reivindicación sobre cal é o primeiro equipo de Galicia. Os Riazor Blues levan toda a semana poñendo pancartas en Abegondo para motivar os seus xogadores de cara ao derbi, e este xoves tocoulle o turno a unha coa frase de Iago Aspas: “O Celta é o mellor equipo de Galicia”.
Foi o dianteiro coruñés Lucas Pérez quen respostou ao goleador celeste, e de paso ao alcalde vigués, Abel Caballero, quen na inauguración dunha pantalla LED nunha fonte de Vigo apuntara: "Aquí poderemos ver o 0-3 do vindeiro derbi en Riazor".
"O alcalde de Vigo que se preocupe de que non se lle inunde Balaídos todos os años, que bastante ten, e de que o Celta non se lle vaia da cidade", recomendoulle o atacante branquiazul a Abel Caballero. Tamén lle enviou Lucas Pérez unha mensaxe a Iago Aspas para deixarlle claro, segundo el, cal é o mellor equipo de Galicia: "A historia está aí, non hai máis que dicir. Non hai máis preguntas, señoría", en referencia aos títulos acadados polo Dépor.
En Vigo tamén se fixo referencia ás pancartas en Abegondo. O capitán do Celta, Hugo Mallo, entende que a afección deportivista queira "motivar" os seus xogadores, e máis, apuntopu, despois de que os celestes gañaran a pasada temporada os tres derbis disputados: os dous da Liga e o amigable do verán en Montevideo.
Pero segundo o capitán celeste, a pancarta do mércores ("Unzué: Qué suerte, el sábado jugamos el derbi"), está fóra de contexto. "Con todo iso, ao final eles danlle máis importancia ca nós. Coido que erran. Escoitei as verbas de Unzué e as pancartas están totalmente fóra de contexto. Co derbi, é moito máis fácil traballar durante a semana. O noso adestrador ía por aí. Tanto para eles coma para nós, sendo o último partido antes das vacacións, esta semana podería ter sido un pouco máis dura” sen o derbi, argumentou o defensa galego.
Malia as pancartas e o cruce de declaracións, tanto adestradores como xogadores dos dous conxuntos apostan por un derbi no que se repita a deportividade das últimas edicións.
