Por Rosalía R. Mendez | Barcelona | 22/12/2017 | Actualizada ás 21:00
A loita entre dous bloques tivo onte un claro gañador: os partidos independentistas. JxCat, ERC e as CUP, suman 70 escanos, dous máis dos 68 que marcan a maioría absoluta no Parlament. Mentres, entre os partidos constitucionalistas, maila a vitoria de Ciutadans, a suma total ascende a 57 escanos, lonxe da maioría que lles permitiría formar un novo goberno.
Desde JxCat consideran que o mandato democrático das urnas é o de traer de volta o president cesado. Carles Puigdemont comparecía onte a noite dende Bruxelas para celebrar que “a República catalá gañaba á Monarquía do 155” e propoñía esta mesma mañá un encontro co presidente do Goberno central, Mariano Rajoy, “sen condicións” para dialogar e atopar unha “solución política” á cuestión catalá. Este encontro tería que celebrarse en Bruxelas ou noutro país da UE, xa que Puigdemont sería detido no caso de entrar en territorio español.
Unha lectura parecida dos resultados fan dende ERC, que quedou como terceira forza máis votada, moi preto de JxCat. Marta Rovira pedía restituir o “Govern lexítimo”, coa liberación do seu líder Oriol Junqueras e a volta de Puigdemont para poder “formar goberno o máis rápido posible que poña fin o 155”.
As CUP, maila perder forza, continúa con catro deputados que terían a chave da formación dun goberno independentista. Pero a súa condición segue a ser a negativa a negociar co Estado. “A única posibilidade é a unilateralidade”, afirmaba onte Carles Riera.
INCÓGNITAS SOBRE UN POSIBLE GOVERN INDEPENDENTISTA
A pesar de presentarse por separado e de certas diferenzas ó longo da campaña entre JxCat e ERC, ambas as dúas forzas soben tanto en votos como en escanos. Son catro máis dos obtidos pola coalición que formaran en 2015, o que lles permite unha maior marxe de manobra que na anterior lexislatura.
Unha abstención dos deputados da CUP sería suficiente para que Puigdemont fose investido president. Coa composición do novo Parlament só serían necesarios os votos a favor do seu partido e os de ERC, sumando 66 a favor e 65 en contra.
Pero aínda que as matemáticas dean unha maioría suficiente para gobernar, aínda queda por resolver moitas outras cuestións sobre cómo funcionaría un Parlament con varios dos seus deputados encarcerados ou se poderá voltar Puigdemont para ser investido president.
O ANSIADO REFERENDO
Aínda que o dereito a decidir non foi clave durante os días de campaña, agora semella coller forza tras as declaracións das últimas horas desde ERc e JxCat. Tanto Puigdemont como Marta Rovira chamaban ó diálogo e abrían a man a posibles alianzas con outros grupos políticos en temas concretos como o referendo de independencia catalán, en clara alusión a Catalunya en Comú.
OS GRUPOS CONSTITUCIONALISTAS NON SUMAN
Á hora de pensar en posibles pactos, queda claro que a suma de C´s, o PSC e o PP non chega a unha maioría suficiente para formar goberno, quedando en 57 escanos, lonxe dunha maioría absoluta ou, cando menos, suficiente. O mesmo número queda se sumamos un posible pacto improbable das forzas tradicionais de esquerdas; PSC, ERC e CenC.
Con todo, Inés Arrimadas comentaba esta mañá que non dá por feito o goberno independentista e tentará formar goberno. Cuitadans foi o partido máis votado onte en Cataluña, concentrando a maioría dos votos na zona de Barcelona e arredores, caladoiros tradicionais dos socialistas.
Se hai algo que quedou patente onte en Cataluña foron as diferenzas salientables entre o rural e as cidades. Mentres en Lleida e Girona arrasaron os independentistas, en Barcelona e Tarragona subían os votos a partidos constitucionalistas como Ciutadans.
O PSC suma un deputado e admite que esperaba mellores resultados. O seu líder catalán, Miquel Iceta, facía autocrítica hoxe recoñecendo que non foran capaces “de xerar suficiente confianza” mentres que Pedro Sánchez criticaba que o PP tiña “menos apoio en Cataluña que unha forza antisistema” e afirmaba que “a única forza capaz de vertebrar España é o PSOE”.
O PP tiña onte os peores resultados da súa historia en Cataluña, pasando de 11 a 3 deputados que pasarán a formar parte do grupo mixto. Lonxe de facer autocrítica, o seu líder Xavier G. Albiol negaba hoxe a posibilidade de dimitir, xa que “iso deixaría o partido nunha situación delicada” e Mariano Rajoy afirmaba que os resultados en Cataluña non son extrapolables a outras eleccións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.