Por Galicia Confidencial | Santiago de Compostela | 25/12/2017 | Actualizada ás 13:56
Trala súa durísima intervención televisiva o 3 de outubro contra o proceso independentista catalán, había moita expectación por escoitar o discurso de Nadal do rei Felipe VI. E, de novo, volveu suscitar avalanchas de críticas por un lado, principalmente dos sectores nacionalistas e da esquerda rupturista, e riadas de aplausos de parte dos constitucionalistas e sectores da dereita.
En Galicia, esas dúas miradas opostas pódense exemplificar en Ana Pontón, portavoz nacional do Bloque Nacionalista Galego, e no presidente da Xunta e líder do PP galego, Alberto Núñez Feijóo.
Para a dirixente do BNG, o discurso de Nadal do rei español foi un exemplo de "rancio centralismo, inmobilismo, e negación das nacións sen Estado".
"A min non me representa", escribiu en Twitter a líder nacionalista, para quen "cada Nadal o Rei se empeña en darnos máis razóns contra a obsoleta monarquía". Unha visión moi diferente da de Feijóo.
O presidente galego gabou as palabras do monarca. De feito, cualificou de "gran discurso" a tradicional mensaxe de Nadal do rei, este ano condicionada polo conflito en Cataluña.
Para Feijóo, foi "un gran discurso del Rey apelando al respeto, la diversidad y la tolerancia". E engadiu: "Es decir, a la convivencia institucional", escribiu en Twitter o mandatario galego, quen dixo confiar nun "futuro que todos los españoles podemos construir juntos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.