Lavado de cara á Casa de Rosalía
A Xunta destina 120.000 euros para uns arranxos que estarán finalizados o 24 de febreiro, Día de Rosalía.
Por Galicia Confidencial | Padrón | 27/12/2017 | Actualizada ás 10:00
A Casa de Rosalía estará en obras ata febreiro. Uns arranxos que comezaron en novembro e que supoñen o investimento de 120.000 euros por parte da Xunta. O obxectivo é rematar antes do 24 de febreiro, Día de Rosalía, data de nacemento da autora.
A intervención que se está a realizar suporá a rehabilitación xeral da envolvente completa dos edificios anexos na traseira da Casa Museo Rosalía que supoñen o reacondicionamento da envolvente exterior (cubertas e carpinterías exteriores, canalóns e baixantes), do corpo de aseos, oficinas, arquivo, antiga casa Maruxa Villanueva e o edificio do auditorio.
Tamén se reformará a planta baixa da antiga Casa Maruxa Villanueva para dar acubillo ás novas oficinas da Fundación Rosalía; e haberá unha rehabilitación integral dos antigos aseos abandonados como aseo accesible para persoas con mobilidade reducida.
E para ver a marcha das obras, o conselleiro de Cultura e Educación, Román Rodríguez, e o secretario xeral de Cultura, Anxo Lorenzo, visitaron a casa da poeta e a reforma dos edificios anexos á Casa da Matanza. E alí foron recibidos polo presidente da Fundación Rosalía de Castro, Anxo Angueira, ademais do alcalde de Padrón, Antonio Fernández Angueira.
