Gómez Noya, reto en Hawai
O pentacampión mundial renunciará as Series Mundias en distancia olímpica para centrar a preparación na longa distancia, co seus obxectivos no campionato do Mundo de Ironman en outubro e no Mundial 70.3, que xa gañou no 2014 e no 2017, en Sudáfrica.
Por gcdeportes | Pontevedra | 27/12/2017 | Actualizada ás 10:09
Pentacampión con cinco títulos no 2008, 2010, 2013, 2014 e 2015; segundo en 2007, 2009, 2012 e 2017; e terceiro no 2011. Todo un récord histórico: dez anos case consecutivos (agás no 2016, mancado) no podio das Series Mundiais de tríatlon.
No 2018, o triatleta galego Javi Gómez Noya (Basilea, 25 de marzo de 1983) buscará novos retos na longa distancia: no medio Ironman, onde xa acadou dous títulos (2014 e 2017), e sobre todo no Mundial de Kailua-Kona (Hawai) de Ironman.
“Nas Series Mundiais probablemente non competiré, porque estarei máis centrado no Mundial de medio Ironman e posiblemente no Campionato do Mundo de Ironman. Eses van ser os retos do ano que ven”, asegurou Gómez Noya en declaracións a TVG.
O Mundial 70.3 está previsto para o 2 de setembro en Sudáfrica, mentres que o mítico Ironman de Hawai será desta volta o 13 de outubro en Kailua-Kona. “Tentaremos seguir ao máximo nivel. O ano que ven será un ano máis enfocado as distancias longas, pero tamén con obxectivos moi ambiciosos”, asegura o ferrolán, que en Hawai coincidirá con outros dous galegos: o veterano Iván Raña en categoría masculina e a pontevedresa Saleta Castro na proba feminina.
O salto á distancia Ironman chega após, segundo Gómez Noya, un dos seus mellores anos. “Foi un ano moi bo en líneas xerais: un campionato do Mundo Ironman 70.3 e un subcampionato do Mundo en distancia olímpica. Sempre se poden mellorar cousas, pero foi un dos mellores anos da miña traxectoria deportiva”, sostén.
