Por E.P. | Compostela | 27/12/2017 | Actualizada ás 17:33
A comisión parlamentaria de estudo sobre incendios terá preto de 70 comparecentes, entre os que só haberá un membro do Executivo galego, a conselleira de Medio Rural, Ángeles Vázquez. En troques, non contará nin co presidente nin co vicepresidente da Xunta, Alberto Núñez Feijóo e Alfonso Rueda, nin coa conselleira de Medio Ambiente, Beatriz Mato.
Nunha accidentada comisión para aprobar o plan de traballo, que se tivo que suspender até en dúas ocasións --unha durante máis dunha hora para negociar entre os grupos e outra para aclarar como realizar a votación-- o grupo maioritario, o PP, accedeu a incorporar algunhas propostas da oposición. Así, elévanse as comparecencias até case 70 e os informes a 44 (a proposta dos populares partía de 38 comparecentes e 28 informes).
Entre os comparecentes propostos pola oposición, que si acepta o PP, súmanse, entre outros, o delegado do Goberno, Santiago Villanueva; o fiscal de Medio Ambiente de Galicia, Álvaro García Ortiz; a directora do Instituto de Estudos do Territorio, Inés Santé; e o experto Edelmiro López Iglesias, que foi director xeral de Desenvolvemento Rural co bipartito. En cambio, non acudirán Núñez Feijóo nin Rueda nin a conselleira de Medio Ambiente, Beatriz Mato, tal e como reclamaban PSdeG e BNG. Tamén bota en falta En Marea algúns perfís técnicos que pedía.
O PP sacou adiante en solitario o plan de traballo desta comisión creada após a vaga de lumes de outubro que arrasou unhas 49.000 hectáreas en Galicia e na que faleceron catro persoas. Xunto a isto, os populares aceptan máis dunha trintena de informes que demandaba a oposición (serán 44 en total) sobre cuestións como: a investigación sobre incendiarios e detencións desde 2006; as perdas provocadas polos lumes; as medidas contra a erosión; as axudas públicas para rozas e devasas; os medios de loita contra o lume operativos en 2017; o impacto paisaxístico ou a incidencia do cambio climático. Tamén se abordará o plan forestal.
COMISIÓN "COXA" POLAS AUSENCIAS
O primeiro en intervir foi Xosé Luís Rivas, Mini (BNG), que criticou que ás comparecencias "fáltanlle máis de dúas patas", pois "debe estar o presidente da Xunta" e "o vicepresidente", nunha lista na que "faltan nomes", o que ve "inxustificable".
A continuación, José Quiroga (PSdeG) expuxo que, aínda que "nunca" se chegue a "un punto de estar a gusto todos os grupos", observa "taras" como a falta de Feijóo e os conselleiros de Medio Ambiente e Vicepresidencia, de forma que o plan de traballo queda "coxo".
Posteriormente, o voceiro socialista, Xoaquín Fernández Leiceaga, acusou aos populares de "devaluar" a presenza da Xunta na comisión "até extremos que non parecen xustificables". Tamén se queixou da falta de membros do ámbito xudicial, xa que o PP defende "a tese" de que a vaga de lumes se trata de "terrorismo incendiario" e cre necesario "contrastar se é así ou non".
Pola súa banda, Luís Villares (En Marea) reprochou "numerosas deficiencias" en informes e comparecencias, á vez que bota en falta participación cidadá. Aquí, queixouse de que os populares non aceptasen os seus "perfís técnicos" propostos, após non pedir a comparecencia de ningún membro do Goberno de Feijóo.
A POSTURA DO PP
En contraposición, José González (PPdeG) queixouse de que "o único punto de discrepancia é o vicepresidente", polo que reta á oposición a que diga se o seu fin nesta comisión "é darlle aos membros do goberno". A En Marea pediulle explicacións por non apoiar o plan de traballo, ao ter incorporado a maioría de expertos que propuña. Finalmente, o deputado popular valorou que esta comisión de estudo sobre os lumes terá "máis comparecencias e informes que a de 2006", así como "máis a petición da oposición".
LISTA DE COMPARECENTES
Entre todos os grupos propúñanse 169 intervencións e finalmente serán preto de 70. A lista de comparecentes está formada pola conselleira de Medio Rural, Ángeles Vázquez; o director xeral de Ordenación Forestal, Tomás Fernández-Couto; os directores xerais de Desenvolvemento Rural, Patrimonio Natural e Emerxencias e Interior. Tamén o delegado do Goberno, Santiago Villanueva, e o fiscal de Medio Ambiente de Galicia, Álvaro García Ortiz.
Os alcaldes que estarán son dos municipios de: Ribeira, Folgoso do Courel, Oímbra, Soutomaior, Nigrán, As Neves, Carballeda de Avia e Cervantes.
A lista continúa co director do Centro de Investigación Forestal de Lourizán; o director da Rede de Parques Naturais de Galicia; ou axente forestal Manuel Gómez Trabada. Haberá expertos como o catedrático de Dereito Civil da UDC, José Manuel Busto; o catedrático de Silvicultura da USC, Roque Rodríguez Soalleiro; o profesor da USC Agustín Merino García; o catedrático de Produción Vexetal Antonio Rigueiro e un representante do grupo de profesores universitarios asinantes do manifesto Por unha nova política para o rural galego.
A lista de expertos prosegue cos profesores universitarios Rubén Lois, Edelmiro López Iglesias, Augusto Pérez Alberti e Alberto Martí Ezpeleta. Tamén haberá membros do Foro Económico de Galicia e o Grupo Colmeiro, entre outros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.