As pernoctacións extrahoteleiras soben un 6,3% en novembro en Galicia, máis que a media

As pernoctacións en aloxamentos turísticos extrahoteleiros galegos(apartamentos, cámpings e casas rurais) aumentaron un 6,3% en novembro respecto ao mesmo mes do ano anterior até un total de 28.493.

Segundo datos do Instituto Nacional de Estatística (INE) publicados este xoves, os viaxeiros incrementáronse un 9,4% até un total de 13.749. A alza de pernoctacións extrahoteleiras en Galicia --nas que non se inclúen albergues ao non haber datos actualizados do penúltimo mes-- está por encima da media española (+2,9%).

Pola súa banda, a estancia media en apartamentos turísticos en Galicia foi en novembro de 2,85 días (era de 2,92 un ano antes); en cámpings foi de 1,98 días no undécimo mes (crece respecto dos 1,83 días de hai un ano), e en aloxamentos de turismo rural foi de 1,63 días (eran 1,67 días hai un ano).

En canto ao persoal empregado, nas casas rurais aumenta até 755 traballadores, fronte aos 702 de novembro de 2016. En apartamentos turísticos baixan até 269 (eran 282 un ano antes). En cámpings son 39 traballadores, suponos unha caída fronte aos 64 de 12 meses antes.

DATOS POR TIPOLOXÍAS

Respecto ao turismo en casas rurais galegas, houbo 13.832 pernoctacións en novembro deste ano, fronte ás 12.458 dun ano antes; á vez que os viaxeiros subiron a 8.485 desde 7.472.

No tocante a apartamentos turísticos, rexistráronse 13.921 pernoctacións no undécimo mes do ano, máis que as 13.454 dun ano antes. Os viaxeiros foron á alza até 4.891 (eran 4.607).

As pernoctacións en cámpings chegaron a 740, neste caso son menos que as 898 dun ano antes. Aquí, os viaxeiros tamén á baixa, foron 373, cando eran 492 en novembro de 2016. No caso de Galicia o INE aínda non ten datos sobre albergues.

DATOS ESTATAIS

As pernoctacións realizadas en aloxamentos turísticos extrahoteleiros superaron os 5,8 millóns en novembro, o que supón un 2,9% máis respecto ao mesmo mes do ano anterior, segundo o Instituto Nacional de Estatística (INE).

No undécimo mes do ano, as pernoctacións de residentes aumentaron un 7% e as de non residentes creceron un 1,6%. A estancia media situouse en 5,4 pernoctacións por viaxeiro.

As pernoctacións dos residentes alcanzaron os 1,45 millóns en novembro, con 535.630 viaxeiros; mentres que as dos procedentes da Unión Europea (excluída España) rozan os 3,8 millóns, con 459.806 viaxeiros. Do resto do mundo, rexistráronse 631.270 pernoctacións, con 98.020 viaxeiros.

Durante o once primeiros meses do ano as pernoctacións incrementáronse un 5,9% respecto ao mesmo período do ano 2016.