Galaxia recompila en dúas novas obras relatos dispersos de Casares e as súas críticas da sección 'A ledicia de ler'

A Editorial Galaxia pechará este ano Casares coa publicación de dúas novas obras sobre o autor homenaxeado nas Letras Galegas, nas que se recompilan, por unha banda, algúns dos seus relatos dispersos en diversas publicacións, como as súas críticas literarias da sección 'A ledicia de ler'.

Ambos os títulos, 'O suicidio de Jonas Björklund e outras historias' e 'A ledicia de ler', foron presentados este xoves en rolda de prensa por parte do director de Galaxia, Francisco Castro, xunto con Xosé Manuel Soutullo e Dolores Vilavedra, implicados en ambas as edicións.

Castro destacou que a editorial cumpre así o obxectivo marcado a principios deste ano, de "pór en valor" toda a obra de Carlos Casares tanto a través de novos formatos como de actualizacións, ademais de publicacións "inéditas" aproveitando os escritos dispersos do autor.

Sobre estas novas obras, 'O suicidio de Jonas Björklund e outras historias' recompila historias desde 1965 até o 2011 que estaban espalladas tanto en libros individuais como en diferentes publicacións, por tanto, "de difícil acceso".

Nestas pezas, relata Soutullo, obsérvanse "os temas literarios da súa obra": a violencia, o dogmatismo, a tolerancia ou o humor, nos que Casares perfila con ironía a personaxes de "verdades absolutas", que "lle causaban risa", despregando "a elegancia e a intelixencia" a través da palabra.

Casares relata figuras en grao sumo variado: desde a "brutalidade" do mestre en 'Lagarto de Pedra', a paralelismos entre a morte de Hemingway (unha figura crucial na súa biografía) coa dun ministro ficticio; a outros nos que plasma o ambiente de "sordidez" e de "falta de motivación" da súa época universitaria.

A obra inclúe, ademais, varias pezas redactadas en castelán que sobre todo respondían a encargos ao autor, dado que el redactaba en lingua galega.

CASARES "MÓLLASE"

A segunda publicación presentada por Galaxia recompila en máis de 800 páxinas un total de 440 artigos de crítica literaria que Casares publicou no diario La Voz de Galicia entre 1975 e 1992, na sección 'A ledicia de Ler', ata que pasou a dedicarse diariamente á columna 'Á Marxe'.

Dolores Vilavedra, especialista e amiga persoal do autor, sinalou que 'A ledicia' formou parte dun proxecto dun "Casares moi lector" nun momento "no que non había unha crítica literaria institucionalizada", comprometéndose ao longo dunha década con esa construción.

A partir de 1985, Casares modificaría o ton e decidiuse a cambiar o tipo de crítica literaria que escribía, "na que se molla moitísimo tanto para encomiar como para denostar", debido ás súas responsabilidades tanto políticas como na Editorial Galaxia.

"Nese momento de responsabilidade", detallou Vilavedra, Casares cambia de rexistro, mirando "máis cara a fóra" e deixando atrás "ese ciclo da transición", e empezando ademais a experimentar con novas seccións. Todo iso desembocou "de forma natural" en 'Á Marxe', columna diaria que o autor mantivo até o día do seu falecemento.