Por E.P. | SANTIAGO DE COMPOSTELA | 29/12/2017 | Actualizada ás 12:45
O número de persoas falecidas con gripe na Comunidade galega desde o inicio da temporada actual ascende a cinco, fronte ao tres da semana pasada, segundo o sétimo informe de 'Vixilancia da gripe en Galicia' publicado este venres polo Servizo Galego de Saúde (Sergas) relativo á semana que terminou o 24 de decembro. Na campaña anterior (outubro 2016-xuño 2017) foron 136 os mortos por este virus.
O informe do Sergas concreta que os cinco falecidos tiñan indicada a vacina, ben por idade ou ben por ter factores de risco para ter unha gripe complicada, e catro deles non estaban vacinados.
Ademais, a data de 27 de decembro había 87 pacientes ingresados con gripe confirmada en hospitais do Sergas e, en total, e desde o principio da temporada declaráronse 226 ingresos con virus da gripe confirmados --o 65% con virus da gripe B; cinco casos con gripe A e B, e o resto con virus A--.
Mentres, o 83 por cento do total dos pacientes ingresados durante esta temporada tiña indicada a vacina antigripal e deles o 56% non a tiña posta.
ONDA EPIDÉMICA
Desde o inicio da temporada, na semana do 2 ao 8 de outubro, até a semana que terminou o 24 de decembro, o número de chamadas atendidas no 061 por gripe e infeccións respiratorias (IRA) ascendeu.
Iso, concreta o Sergas no seu sétimo informe, "indica o inicio da onda epidémica", como xa anunciaba o sistema de vixilancia cos rexistros en Atención Primaria aínda que, de momento, "cun nivel de intensidade baixa".
COLAPSO URXENCIAS
Estes datos chegan cando houbo varios hospitais galegos --A Coruña, Santiago, Vigo ou Ourense-- que rexistraron colapsos sanitarios ao longo deste mes, a pesar de que non hai epidemia de gripe. Unha situación que o presidente da Xunta asegura que é "puntual".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.