Un observatorio de servizos urbanos recoñece a Vigo polo seu sistema de recollida de lixo porta a porta

O Observatorio dos Servizos Urbanos (OSUR) seleccionou á cidade de Vigo, dentro da categoría de recollida de lixos e residuos, pola implantación do sistema de recollida de lixo porta a porta na zona vella da cidade, que implicará un sistema máis personalizado na xestión do residuo e evitará a presenza de colectores nunha zona de rúas estreitas e con carácter singular.

Por primeira vez esta entidade recoñece "a vontade de excelencia" na prestación dos servizos públicos municipais a diferentes cidades a partir de feitos concretos que supoñen un salto cualitativo na calidade, na eficacia ou na eficiencia do servizo prestado, á súa equidade e sustentabilidade. Recoñecemento enfocado ás persoas, xa sexa na súa calidade de cidadáns ou de traballadores, públicos ou privados, dos servizos.

Cada trimestre sinalará os intentos "serios" de avanzar cara á excelencia na prestación dos servizos públicos das principais cidades e pobos de España, e pola contra, porá na picota aqueles feitos que manifesten "degradación e mal desempeño do servizo".

Para a selección estipuláronse cinco categorías: transporte público, subministración de auga, recollida de lixos, limpeza viaria e coidado de parques e xardíns.

En concreto, no caso de Vigo, OSUR destacou que, desde agosto, o Concello aprobou un novo contrato de periodicidade da recollida de lixos do Casco Vello, dúas veces ao día de luns a domingo.

Este novo sistema aplicarase non só a locais e hostalaría, senón tamén ás vivendas dos residentes, o que supón "un paso definitivo na eliminación dos colectores do barrio histórico así como de ruídos", destaca.

Así mesmo, tamén se tivo en conta a ampliación do punto limpo móbil, que agora permitirá recoller produtos contaminantes ou perigosos.

Co novo contrato utilizaranse vehículos de limpeza "ecoloxicamente efectivos" con mínimo nivel de emisións para substituír aos antigos de combustibles fósiles tradicionais.

Para o director xeral de OSUR, Ramiro Aurín, "non parece casualidade esta actuación". Sinala que precisamente no I barómetro OSUR, que mide a satisfacción dos servizos urbanos por parte dos cidadáns, publicado no mes de agosto, a recollida de lixos satisfacía a un 67% dos vigueses.

"Pero non só ese servizo, se non que todos aprobaban con boa nota e situaban a Vigo arriba na percepción cidadá dos seus servizos", engade.

A adecuación e o axuste dos servizos á singularidade de cada xeografía urbana é, ao seu xuízo, "fundamental", e esa é a tendencia no tratamento da recollida de lixos nos núcleos históricos das cidades. "Por atender ben a ese principio resaltamos positivamente a Vigo", subliñou.

CIDADES REFERENTES E MUNICIPIOS CON CARENCIAS

Ademais de Vigo no lado positivo, entre outro nove, foron recoñecidas Pamplona, pola percepción que teñen os seus habitantes dos servizos públicos municipais; Alacante, cidade que foi recoñecida no apartado de transportes públicos e no de subministración de augas e Barcelona, polos seus avances na dixitalización dos seus servizos de auga, orientados a mellorar a experiencia do cidadán co servizo.

Respecto dos municipios onde se detectaron problemas, OSUR sinalou, por unha banda, as que se producen de forma bastante xeneralizada e que merecen unha reflexión de medios e planificación, e doutra banda algún exemplo de desprezo á excelencia no servizo ao cidadán por prexuízos ou intereses políticos.

Así, sinalou ás cidades de Málaga, Palma de Mallorca e Valladolid, por deficiencias na limpeza viaria e na planificación da recollida de residuos no caso da primeira e segunda; e por avarías e cortes de subministración de auga das últimas semanas no caso valisoletano.

Na cidade de Valencia, as principais carencias detectadas producíronse no ámbito do transporte público, mentres que, en Cádiz, o abandono dalgúns parques e xardíns de extramuros foi o motivo polo cal se sitúa entre os municipios con servizos deficientes.