SANTIAGO DE COMPOSTELA | 31/12/2017 | Actualizada ás 11:51 por EUROPA PRESS
Un equipo especial da Garda Civil atópase á espera da chegada do xuíz de garda para proceder á recuperación do presunto corpo de Diana Quer, que se atopa nun pozo situado no interior da nave industrial da parroquia de Asados, en Rianxo (A Coruña), sinalada polo principal sospeitoso do crime, José Enrique A. G., Quique, alias 'o Chicle'.
Unha vez sexan recuperados os restos, deberán realizarse as probas pertinentes para determinar se se trata de Diana Quer, a moza madrileña desaparecida a noite do 22 de agosto na localidade coruñesa da Pobra do Caramiñal (A Coruña).
Segundo confirmaron a Europa Press fontes policiais, José Enrique A. G., Quique, alias 'o Chicle', confensou na madrugada do domingo o lugar onde presuntamente se desfixo do corpo de Quer. Trátase dunha nave abandonada situada na parroquia de Asados, lugar de nacemento de 'o Chicle'.
Paralelamente aos traballos que levan a cabo na citada nave, axentes da investigación realizan rexistros de forma coordinada noutros puntos da zona para solicitar probas sobre o caso.
A muller do principal sospeitoso, Rosario R., detida o pasado venres, quedou en liberdade a última hora do sábado logo de cambiar a súa versión e asegurar agora que non estivo co seu marido, o principal sospeitoso da desaparición de Diana Quer, a noite do 22 de agosto, cando se perdeu o rastro da moza madrileña na Pobra do Caramiñal (A Coruña).
Este cambio na principal coartada da que se valía José Enrique A. G. precipitou que confesase, na madrugada do domingo, o lugar onde supostamente depositou os restos de Quer.
'O Chicle', que conta con varios antecedentes policiais por tráfico de drogas, foi detido o pasado venres como presunto autor dun intento de secuestro doutra moza en Boiro (A Coruña).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.