Por E.P. | A CORUÑA | 02/01/2018 | Actualizada ás 14:45
A Garda Civil "revaluará" outros casos, "sobre todo de violación", para determinar se José Enrique Abuín Gey, O Chicle, está implicado en máis delitos, após a súa detención como autor confeso da morte de Diana Quer. Así o confirmou o coronel xefe da Unidade Operativa (UCO) da Garda Civil, Manuel Sánchez Corbi, quen, no entanto non considerou que poida existir vinculación entre o detido e a desaparición de Manuela Lorenzo, unha septuaxenaria que falta da súa aldea, en Boimazán (Boiro), desde o 25 de xullo do 2015.
A preguntas dos xornalistas, o coronel xefe da UCO sinalou, en alusión ao caso de Diana Quer e o da moza que o pasado 26 de decembro denunciou un intento de secuestro en Boiro e deu datos coincidentes co físico e o coche de O Chicle --segundo explicou a Garda Civil--, que o detido buscaba "vítimas moi novas". Así, situou a idade destas arredor dos 18 anos ou con aparencia desta idade.
Sobre esa cuestión, o coronel xefe da Comandancia da Coruña, Francisco Javier Jambrina, apuntou á "coincidencia" de casos. En concreto, ratificou que, en 2005, o detido agrediu sexualmente á súa cuñada cando esta aínda contaba con 17 anos.
Mentres, dixo que, após a denuncia o pasado 26 de decembro da moza de Boiro, empézanse a ver "nexos na forma de actuar" co caso de Diana Quer. Por todo iso, descartou calquera relación co da septuaxenaria desaparecida.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.