SANTIAGO DE COMPOSTELA | 02/01/2018 | Actualizada ás 15:57 por EUROPA PRESS
O coronel xefe da Unidade Central Operativa (UCO) da Garda Civil, Manuel Sánchez Corbi, cualificou a José Enrique Abuín Gey, 'O Chicle', detido o pasado 29 de decembro despois do intento de secuestro dunha moza en Boiro e autor confeso da morte de Diana Quer, como un "criminal moi agudo".
A este feito e á "falta de probas", xunto á coartada que lle deron a súa muller e os seus cuñados en relación co que fixo o día en que desapareceu Diana Quer -na madrugada do 22 de agosto de 2016- atribuíu que non se procedese antes á súa detención a pesar de que en novembro de hai dous anos xa se lle consideraba "o principal sospeitoso".
Con todo, foi "unha grave filtración á prensa", en palabras do coronel xefe da Comandancia da Coruña, Francisco Javier Jambrina, o que obrigou á Garda Civil -unha vez que se fixese público un intento de secuestro en Boiro e a chegada de efectivos da UCO- "a reaccionar rapidamente" e deter a 'O Chicle' e a súa muller na mañá do 29 de decembro.
"PUNTO DÉBIL" DA INVESTIGACIÓN
Sobre o caso de Diana Quer, o coronel xefe da UCO aclarou, en rolda de prensa, que "en novembro de 2017 xa non tiñan "ningunha dúbida" da relación de 'O Chicle' coa desaparición de Diana Quer e que a única incógnita era se actuara "só".
Con todo, admitiu que "o punto débil" da súa investigación era "a xente que lle deu cobertura", apuntou en referencia á muller do detido e aos seus cuñados, que ofreceron unha coartada sobre onde se atopaba a noite que desapareceu a moza madrileña.
Nunha investigación na que se chegaron a analizar "máis de dous millóns de datos", en alusión ao estudo que se fixo de móbiles e o visionado de 40 cámaras, a Garda Civil recoñeceu que a denuncia da moza que alertou do seu intento de secuestro en Boiro permitiu "ver nexos" co caso de Diana Quer nunha investigación na que se tiña xa a 'O Chicle' baixo vixilancia.
O coronel xefe da UCO explicou que é alguén "relativamente profesional no mundo da delincuencia". Como dato, sinalou que "para sortear" a investigación deixou no seu móbil -que facilitou á Benemérita, pero "reseteado"-, conversacións "preparadas" entre el e a súa muller. "É alguén que sabe que o ten que facer", sentenciou.
Preguntado, por outra banda, en que medida afectou que se decretase por parte do xulgado o arquivo provisional do caso de Diana Quer, o responsable da Benemérita dixo que é "fácil" expor esta cuestión agora "cando se chegou ao final do relato".
"O xuíz só atende a probas", insistiu ao apoiar a actuación xudicial, pero tamén dos investigadores. "Non faltaron recursos, nin ganas", insistiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.