A 'Carmen' máis innovadora, en Vigo

Afundación, a Obra Social de Abanca, recibe no seu teatro de Vigo (Policarpo Sanz, 13) o Ballet de Víctor Ullate o vindeiro martes 9 de xaneiro, a partir das 20.30 horas, coa súa reinterpretación do clásico Carmen de Georges Bizet. As entradas para asistir pódense adquirir xa na web ataquilla.com.

Máis dun século despois da súa estrea, esta nova proposta quérese afastar dos tópicos para introducirse na esencia da historia e verter nova luz sobre un dos personaxes máis poliédricos da ficción contemporánea: Carmen. Para iso foi necesaria unha actualización: recrear un espazo atemporal afastado de todo costumismo, de maneira que non se interpoña entre o espectador e a protagonista ningún tipo de barreira temporal; e unha revisión: porque unha peza que ten máis dun século de antigüidade necesita dunha mirada nova e audaz, pero absolutamente respectuosa coa esencia da historia.

Con estas premisas expuxéronse a escenografía e o vestiario, modernos e atemporais. Carmen é a historia da muller fatal, coqueta, sedutora, é o concepto da muller apaixonada que atopa na sociedade que a rodea un marco estreito que a encorseta e do que quere escapar. Esta versión sitúa á protagonista nunha nova dimensión de luxo e glamour: unha modelo de alto nivel que polas noites se converte en escort.

A música de Carmen de Víctor Ullate ofrece un novo percorrido pola inesgotable partitura de Bizet á vez que inclúe composicións orixinais. Música sinfónica, percusións étnicas ou tambores xaponeses mestúranse con temas de raíz máis popular para percorrer esta historia.